सहिद परिवारको माग– ‘मुख्य मन्त्रीज्यू, कम्तिमा शालिक बनाइयोस्’

A+ A A-

कर्णाली प्रदेशका मुख्यमन्त्री महेन्द्रबहादुर शाहीलाई प्रदेश स्थापनार्थ भएको आन्दोलनमा सहिद भएका परिवारले सम्झिनका लागि सहिदको शालिक बनाइदिन आग्रह गरेका छन् ।

बिहीबार मुख्यमन्त्री शाहीलाई भेटेर सहिद परिवारका सदस्यहरूले सहिदहरूलाई सम्झनकै लागि कुनै काम नगरेको बताए । प्रदेश स्थापनार्थ भएको आन्दोलनमा सहिद भएका चार जना सहिदका परिवारले सहिद सम्झनका लागि भए पनि शालिक बनाउन मुख्य मन्त्रीसँग आग्रह गरेका हुन् ।

सहिदहरूलाई भुल्दै जान थालिएको सहिद परिवारका आफन्तहरूले मुख्यमन्त्रीसँग गुनासो गरेका थिए । कर्णाली प्रदेश निर्माणका लागि सहिदहरूले बलिदान दिएको र अहिले कर्णाली प्रदेश सरकारले सहिदहरूको सम्झनाका लागि कुनै पनि काम नगरेकोप्रति सहिद हरिबहादुर कवुँरका दाजु राजबहादुर कुँवरले गुनासो गरे ।

‘प्रदेश स्थापना गर्नका लागि चार जना सहिद नभएको भए केही हुँदैन थियो,’ उनले भने, ‘अहिले सहिदहरूलाई सम्झनका लागि प्रदेश सरकारले शालिक पनि राख्न सकेको छैन ।’

भाषणमा सहिदहरूको बलिदानका विषयमा सधै सम्झने गरेकोमा गर्व लाग्ने गरेको तर, अहिलेसम्म पनि प्रदेश सरकारले सहिदको सालिक पनि बनाउन नसकेको सहिद यामबहादुर बिसीको बहिनी भगवती बिसीले बताइन् ।

‘सहिदहरूलाई केवल औपचारिक कार्यक्रममा मात्र सम्झिने गरिएको छ,’ उनले भनिन्, ‘सहिदहरूलाई सम्झनका लागि चोकहरूमा शालिक निर्माण गरियोस् ।’

सहिदका आफन्तजनहरूले सहिद परिवारकाे हो भन्ने परिचय पनि दिने कुनै आधार नभएको मुख्य मन्त्रीसँग गुनासो गरेका थिए ।
सहिद परिवारका विषयमा आफू गम्भीर भएको र सहिद पार्क बनाउने त्यहाँ प्रदेश स्थापनार्थ सबैको शालिक राख्ने तयारी भएको मुख्य मन्त्री शाहीले बताए ।

‘हामी सहिदको बलिदानकै कारण प्रदेशको स्थापना भएको हो,’ उनले भने, ‘सहिद परिवारका समस्याका विषयमा गम्भीर छौं ।’

सहिद परिवारको उपचार खर्च, रोजगारी पार्क निर्माण र प्रतिष्ठानका विषयमा छलफल भइरहेको चाडै नै यस विषयमा मन्त्रिपरिषदमा निर्णय हुने मुख्यमन्त्री शाहीले बताए ।

‘हामी सहिद प्रतिष्ठान बनाउने कार्यविधि बनाउँदै छौं,’ उनले भने, ‘त्यो प्रतिष्ठानमार्फत सामाजिक कार्य हुनेछन् ।’ सहिद परिवारका समस्याका बिषयमा कर्णाली प्रदेश सरकार गम्भीर भएको सामाजिक विकास मन्त्री दल रावलले बताए ।

‘सहिद परिवारका विषयमा कर्णाली प्रदेश सरकार गम्भीर छ,’ उनले भने, ‘चाँडै सहिदका परिवारलाई परिचयपत्रको व्यवस्था गरिनेछ ।’

सहिदहरूको सम्झनामा कर्णाली प्रदेश स्थापना भएको दिन २२ भदाैलाई बलिदान दिवसका रूपमा मनाउन प्रदेश सरकारले तयारी थालेको मन्त्री रावलले बताए ।

कर्णाली प्रदेश स्थापनाका क्रममा २०७२ साउन/भदौमा सञ्चालित १३ दिने आन्दोलनमा सुर्खेतका यामबहादुर बीसी, गोपालसिंह रजवार, टीकाराम गौतम र जुम्लाका हरिबहादुर कुँवर सहिद भएका थिए ।

प्रकाशित मिति: बुधबार, मंसिर ४, २०७६ ११:२७