मृत्यु मार्ग अब सुरुङ मार्ग बन्दै, निर्माणका लागि बजेट स्वीकृत

A+ A A-

मृत्यु मार्गको रूपमा चिनिएको बुटवल–तानसेन सडक खण्डअन्तर्गतको सिद्धबाबा क्षेत्रमा सुरुङ निर्माण हुने भएको छ । लामो समयदेखि चर्चामा रहेको सुरुङ मार्ग निर्माणका लागि बजेट स्वीकृत गरेको छ ।

अर्थ मन्त्रालयले भौतिक पूर्वाधार तथा यातायात मन्त्रालयलाई पत्र लेख्दै वार्षिक बजेटमा १० अर्ब ५० करोडको सीमाभित्र रहेर खरिद प्रक्रिया अगाडि बढाउन भनेको छ । योसँगै सुरुङ मार्ग बन्ने आशा यहाँका जनताले गरेका छन् । वार्षिक ५० भन्दा बढीको मृत्यु हुने सिद्धबाबा खण्डको ३ किलोमिटर क्षेत्रमा सुरुङ निर्माण हुने बताइएको छ । त्यसका लागि यसअघि नै भौर्गविक अध्ययन गरिएको थियो । अध्ययनपछि सिद्धबाबामा सुरुङ निर्माण गर्नका लागि बजेट स्वीकृत गरिएको हो ।

अब सुरुङ खन्ने प्रक्रियाका लागि ग्लोबल टेण्डरमा जाने बाटो खुलेको यातायात मन्त्रालयले जनाएको छ । सुरुङ मार्गको लागि निरन्तर प्रयत्न गर्दै आएका नेकपाका महासचिव एवं रुपन्देहीका सांसद विष्णु पौडेलले सिद्धबाबा सडकमा सुरुङ निर्माण सुरु गर्न ब्रेकथ्रु भएको भन्दै खुशी व्यक्त गरे ।

‘अब सुरुङ मार्ग बनाउन सडक विभागले ग्लोबल टेण्डर आब्हान गर्नेछ,’ उनले भने । सुरुङ निर्माणका लागि ड्रिलिप नेपालले गुरुयोजनाको काम गर्नुपूर्व भौगर्विक अध्ययन गरेको थियो । सो क्षेत्रमा स्यानस्टोन र मोडस्टोन खालको चट्टान भेटिएको र सुरुङ निर्माण गर्न सकिने प्रतिवेदन ड्रिलिप नेपालले बुझाएको थियो ।

सुरुङ मार्ग पाल्पाको सिद्धबाबा मन्दिरको उत्तरतर्फको चिडिया खोलाको छेउबाट सुरुङ सुरु हुनेछ । चिडिया खोलाको सुरुङ प्रवेशद्वारमा करिब २० मिटर सिधा प्वाल पारेर चट्टान निकालिएको छ । दोभाननजिकै रामापिथेकस पार्कको उत्तरतर्फ ९० मिटरको ६० डिग्री कोणमा प्वाल पारिएको छ । चट्टानको चुचुरो र सडकको बीच भागमा समेत प्वाल पारेर चट्टान निकालिएको छ ।

यसअघि भएको प्रारम्भिक अध्ययनमा सुरुङसहित रकनेट, रकसेट, हाफ टनेलसहितका छ वटा विकल्प दिइएको थियो ।