माथिल्लो त्रिशूली थ्री ‘ए’ को औपचारिक उद्घाटन आज

A+ A A-

गत चैत्रदेखि नियमित विद्युत् उत्पादन सुरु गरेको माथिल्लो त्रिशूली ‘ए’ आयोजनाको औपचारिक उद्घाटन आज हुने भएको छ ।

प्रधानमन्त्री तथा मन्त्रिपरिषद्को कार्यालयमा रहेको ‘एक्सन रुम’बाट ऊर्जा जलस्रोत तथा सिँचाइमन्त्री वर्षमान पुन आयोजनास्थल नुवाकोटको किस्पाङ गाउँपालिका–५ सिम्लेमा उपस्थित भएर आयोजनाको उद्घाटन गर्न लागिएको प्राधिकरणले जनाएको छ ।

प्राधिकरणका कार्यकारी निर्देशक कुलमान घिसिङले लामो प्रयास र मिहेनतपछि ६० मेगावाट क्षमताको आयोजना सम्पन्न भएको र आज औपचारिक रूपमा उद्घाटनको कार्यक्रम तय गरिएको जानकारी दिए । सरकारले ऊर्जा क्षेत्रलाई आर्थिक समृद्धिको आधारका रूपमा स्थापित गरेको छ ।

नेपाल विद्युत् प्राधिकरणका कार्यकारी निर्देशक कुलमान घिसिङले आयोजनाबाट मुलुकभित्र खपत हुने ऊर्जामा करिब ८ प्रतिशत योगदान रहेको बताए ।

अनुमानित लागत १२ अर्ब ६० करोड रहेको आयोजना नेपाल सरकार एवं प्राधिकरणको लगानी र चिनियाँ आयात निर्यात बैंकको सहुलियतपूर्ण ऋणमा निर्माण भएको हो ।

इन्जिनियरिङ, खरिद र निर्माण (इपीसी) ढाँचामा विद्युत्गृह, बाँध, सुरुङलगायतका संरचना र इलेक्ट्रोमेकानिकल तथा हाइड्रो मेकानिकलको काम गर्नेगरी चिनियाँ कम्पनी गेजुवासँग २०६७ साल जेठ १४ गते सम्झौता भएको थियो ।

२०७१ मा आयोजना सम्पन्न गर्ने लक्ष्य राखिएको थियो । त्यसबेला चिनियाँ कम्पनीसँग ८ अर्ब ९१ करोड ७८ लाखमा ठेक्का सम्झौता भएको थियो ।

सुरुमा विद्युत्गृह भूमिगत बनाउने या सतही बनाउने विवाद, क्षमता बढाउने निर्णयलगायत कारणले आयोजनाको निर्माण ढिलाइ भएपछि २०७३ साल असार १६ सम्म म्याद थप भएको थियो ।

आयोजना प्रमुख फणीन्द्रराज जोशीका अनुसार बहुप्रतिक्षित आयोजनाको उद्घाटनका लागि आयोजनास्थलमा भव्य तयारी गरिएको छ । प्राधिकरणका अनुसार यो आयोजनाबाट करिब ९ महिना पूर्ण क्षमतामा विद्युत् उत्पादन हुनेछ ।

यस्तै हिँउदमा भने ४५ मेगावाट विद्युत् उत्पादन गर्नेछ । आयोजनाबाट उत्पादित विद्युत् त्रिशूली–काठमाडौं २२० केभी क्षमताको प्रसारण लाइनमार्फत राष्ट्रिय प्रसारण प्रणालीमा जोडिएको छ ।

प्रकाशित मिति: सोमबार, मंसिर २, २०७६ ०८:२३