कर्णालीकाे प्राथमिकतामा उत्तरी नाका, बजेट अभावले काम सुस्त

A+ A A-

कर्णाली प्रदेश सरकारले कर्णालीका उत्तरी नाकालाई प्राथमिकतामा राखेको छ । तर, कर्णाली प्रदेशका उत्तरी नाका मुगुको नाक्चेलाक्ना, डोल्पाको मोरिल्ला र हुम्लाका हिल्सामा सुस्त गतिमा काम भइरहेको छ ।

चीन सरकार कर्णाली प्रदेशको उत्तरी नाका हिल्सा खोल्नका लागि तयार भएको छ भने मुगुको नाक्चेगाल्ना र डोल्पाको मोरिल्ला नाका खोल्न भने आनाकानी गर्दै आएको छ । सरकारले प्राथमिकतामा राखेका योजनाहरू राष्ट्रिय गौरवका आयोजनामा नराखी थोरै बजेट विनियोजन गर्दा अहिले कर्णालीका उत्तरी नाका खोल्नमा सकस नै छ ।

नाक्चेलाग्ना बजेटको अभाव

कर्णाली प्रदेशको उत्तरी नाकाका रूपमा रहेको नाक्चेलाग्ना नाका खोल्नका लागि प्रदेश सरकारले प्राथमिकतामा राख्दै आएको छ । मुगुको गमगढीदेखि नाग्चेलाग्नासम्मको ९६ किलोमिटरमध्ये हाल गमगढीदेखि थाइलसम्मको १६ किलोमिटर ट्रयाक खुलेको छ ।

१६ किलोमिटर सडकको ट्रयाक ओपन भएअगाडिका वर्षमा बजेट नै विनियोजन नभएको र चालू आवमा १० करोड रुपैयाँ बजेट विनियोजन गरिएको सडक डिभिजन कार्यालय जुम्लाका प्रमुख श्रवणकुमार महताराले बताए । ‘गत आर्थिक वर्षमा नाग्चेलाग्ना सडक निर्माणका लागि बजेट नै आएन,’ उनले भने, ‘यो आर्थिक वर्षमा १० करोड बजेट आएको छ । डीपीआर तयार भएर अहिले ठेक्का खोल्ने तयारीमा छौं ।’

नाक्चेलाग्ना नाका खोल्नका लागि सरकारले विनियोजन गरेको बजेटमध्ये थाइलभन्दा अगाडि ठूलो नाङ्लेभीर रहेको त्यो भीर फोड्नका लागि अनिवार्य ब्लास्टिङ गर्नुपर्ने प्रमुख महताराले बताए । ‘ठूलो भीर छ । बजेट थोरै छ । ब्लास्टिङ गर्नुपर्नेछ,’ उनले भने, ‘उत्तरी नाका खोल्नका लागि यो रकम अपर्याप्त छ ।’

सरकारले राष्ट्रिय प्राथमिकतामा राखेको उत्तरी नाकालाई बजेट थोरै दिने गरेको र सरकारी चासो कमै हुने गरेको प्रमुख महताराले बताए ।

नाग्चेलाग्ना नाका खोल्नका २०६७ देखि निर्माण सुरू भएको हो । यो सडकमा १० करोड रुपैयाँ खर्च भइसकेको छ । सुर्खेतबाट नाग्मा, गमगढी हुँदै तिब्बतको सीमासम्म ३ सय ९० किलोमिटर लम्बाइ रहेको यो सडकका लागि बजेट थोरै आउने गरेको सडक डिभिजन कार्यालय जुम्लाले जनाएको छ ।

बजेट अभावमा डोल्पाको मोरिल्ला नाका

भेरी कोरिडोर हुँदै डोल्पाको मोरिल्ला नाका खोल्नका लागि सरकारले चालू आवका लागि बजेट नै विनियोजन गरेको छैन ।

डोल्पाको दुनैदेखि मोरिल्लासम्मको १ सय २७ किलोमिटर सडकमध्ये डोल्पाको धौदेखि चीनको मोरिल्ला जोड्ने ६५ किलोमिटर सडक ट्रयाक खुलिसकेको सडक डिभिजन कार्यालय रूकुम चौरजहारीका प्रमुख नरेन्द्र भट्टले बताए ।

उनले भने, ‘डोल्पा सदरमुकाम दुनैदेखि मोरिम्लासम्म १२७ किमिमध्ये मोरिल्लादेखि दुनैतर्फको धौसम्मको ६५ किलोमिटर सडक निर्माण भइसकेको छ । त्यसबीचको सडक निर्माण कडा चट्टान भएका कारण समस्या भएको छ ।’

दुनैदेखि धौसम्मको सडक निर्माणका लागि वातावरणीय मूल्याङ्कनको काम शुरू भएको तर सरकारले बजेट विनियोजन भने भइनसकेको प्रमुख भट्टले बताए । उनले भने,‘वातावरणीय मूल्याङ्कन भएपछि बजेटको व्यवस्था हुन्छ ।’

प्रकाशित मिति: आइतबार, मंसिर १, २०७६ १९:१३