प्रधानमन्त्रीका ११ बहिर्गमित सल्लाहकारः ५ घरमै, ६ बालुवाटार फर्किंदै

A+ A A-

प्रधानमन्त्री केपी शर्मा ओलीको सचिवालय १२ जना सहयोगीले धान्दै आएका थिए । प्रधानमन्त्रीका हरेकजसो गतिविधिमा उनीहरूको सहयोग छ । चिवालयका कारण पटक–पटक विवाद र आलोचना खेप्न परेपछि ओलीले एक दर्जन सल्लाहकारमध्ये राजेश वज्राचार्यबाहेक ११ जनालाई राजीनामा दिन निर्देशन दिए ।

प्रधानमन्त्रीको निर्देशनपछि २२ र २४ कात्तिकमा ११ जनाले नै राजीनामा बुझाए । राजीनामाको एक सातासम्म पनि प्रधानमन्त्रीले नयाँ सल्लाहकार नियुक्त गरेका छैनन् । तर, सचिवालयबाट राजीनामा दिएका सहयोगीहरू भने पुरानै स्थानमा फर्कन दौडधुप गर्दैछन् ।

थापासँग बढी रुष्ट

२९ चैत २०७५ मा प्रधानमन्त्रीको निजी सचिवालयको लेटरहेटमार्फत प्रधानमन्त्री ओलीको निर्वाचन क्षेत्र झापा– ५ मा ६८ वटा योजनाका लागि बजेट माग गरेर योजना आयोगमा पत्र लेखियो ।

पत्र सार्वजनिक भएपछि प्रधानमन्त्रीका प्रेस सल्लाहकारले जानकारीबिना नै बजेट मागेको भन्दै प्रधानमन्त्री आश्चर्यमा परेको विज्ञप्ति निकाले । ओली यो पत्रबाट दुःखी भएको अर्यालले विज्ञप्तिमै लेखे ।

प्रधानमन्त्रीले दुःख व्यक्त गरेपछि पत्र कसरी आयोगमा गयो भनेर खोजी भयो । खोज्दै जाँदा पत्ता लाग्यो प्रधानमन्त्रीको निजी सचिवालयको लेटरहेड प्रयोग गरेर योजना माग्ने रहेछन्, उनकै सचिवालयमा कार्यरत होम थापा । उनी प्रधानमन्त्रीको सहायक स्वकीय सचिव हुन् ।

सो घटनाबाट रुष्ट प्रधानमन्त्री होमसँग सबैभन्दा बढी असन्तुष्ट थिए । हटाउने उपयुक्त मौका खोजिरहेका थिए । र, त्यो मौका जुर्‍याे, गत २४ कात्तिकमा ।

प्रधानमन्त्रीका सचिवालयकै पूर्वकर्मचारीका अनुसार सचिवालयमा फर्कन नपाउने पहिलो नम्बरमा छन् होम थापा ।

प्रेसमा दुवै नयाँ अनुहार

प्रधानमन्त्रीको प्रेस हेर्न सचिवालयमा ३ जना छन् । पत्रकारिताका गुरु कुन्दन अर्याल, पत्रकार रामशरण बजगाईं र चेतन अधिकारी ।

चेतन प्रेससँगै प्रधानमन्त्रीको भ्रमण तालिका पनि व्यवस्थित गर्छन् । स्राेतका अनुसार प्रधानमन्त्रीकै गृहजिल्लाका चेतनसँग प्रधानमन्त्री सन्तुष्ट छन् । उनी पुनः बालुवाटार फर्कने लिस्टमा छन् । तर बजगाँइ भने नफर्कने भएका छन् ।

प्रधानमन्त्रीको स्वास्थ्य अपडेटलगायतका सूचना सम्प्रेषणका कारण विवादमा पर्दै आएका कुन्दन अर्याल राजनीतिक सल्लाहकार विष्णु रिमालसँगको टक्करका कारण सचिवालयबाट बाहिरिँदैछन् ।

रिमाललाई ओलीले नेताभन्दा बढी व्यवस्थापकका रूपमा विश्वास गरिरहेका छन् । यही कारण नयाँ टिममा पुरानै भूमिकामा फर्कने तयारीमा छन् रिमाल । तर, बालुवाटार स्राेतका अनुसार राजनीतिक सल्लाहकारमा नेकपाका मन्त्री भइसकेका केही नेताको नाममा पनि छलफल भने चलिरहेको छ ।

जनसम्पर्क र विकास विज्ञ बाहिरिँदै

राजीनामा दिएर बसेका जनसम्पर्क सल्लाहकार अच्युत मैनाली र विकास विज्ञ घनश्याम भट्टराई भने बालुवाटार नफर्कनेको लिस्टमा छन् । दुवैको कामप्रति प्रधानमन्त्रीले लामै समयदेखि असन्तुष्टि जनाइरहेका कारण उनीहरूको पुनरागमनको सम्भावना नभएको स्राेतको दाबी छ ।

बलिया राजन, अस्गर, इन्द्र र कृष्ण

प्रधानमन्त्रीको सचिवालयमा फर्कने बलिया दाबेदार विष्णु रिमाल र चेतन अधिकारी हुन् । उनीहरूसँगै परराष्ट्र सल्लाहकार राजन भट्टराई, आईटीविज्ञ अस्गर अली, स्वकीय सचिव इन्द्र भण्डारी र फोटोग्राफर कृष्ण पौडेल पनि सचिवालयमा पुनः नियुक्ति पाउने लिस्टमा छन् ।

उनीहरूको कामबाट प्रधानमन्त्रीको खास असन्तुष्टि नरहेका कारण पुनः बालुवाटार फर्कने सम्भावना रहेको स्राेतको दाबी छ ।

प्रकाशित मिति: बिहीबार, कात्तिक २८, २०७६ १७:३३