सामाजिक अपराधका विषयमा विद्यार्थीका प्रश्न, प्रहरीकाे जवाफ

A+ A A-

‘प्रहरी दिवस २०७६’ को पूर्वसन्ध्यामा महानगरिय प्रहरी वृत्त कमलपोखरी, सामुदायिक सेवा केन्द्र कालोपुल तथा सेन्ट जर्ज स्कुलको सहकार्यमा अपराध न्यूनिकरण तथा सुरक्षा सतर्कतामा विद्यार्थीको चासो बढाउने उद्देश्यले वक्तृत्वकला प्रतियोगिता आयोजना गरेको छ ।

‘अपराध नियन्त्रण र शान्ति सुरक्षा प्रवद्र्धनमा समुदाय र प्रहरीको सहकार्य’ विषयमा भएको वक्तृत्वकला प्रतियोगीतामा वक्ता विद्यार्थीले उठाएका प्रश्नको महानगरीय प्रहरी वृत्त कमलपोखरीका प्रहरी निरिक्षक दिनेश गुरुङले सम्बोधन गरेका थिए । नागरिक आफैं सचेत एवं जागरुक भएमा समाजमा हुने अपराधजन्य गतिविधि न्यूनिकरणमा ठूलो टेवा पुग्नेमा निरिक्षक गुरुङले जोड दिए ।

प्रतियोगीहरुले समाजमा घटेका अपराधका समसामयिक विषयमा केन्द्रित रहेर आफ्नो धारणा राखेका थिए । उक्त प्रतियोगितामा कक्षा ९ की रेजिना श्रेष्ठ प्रथम तथा कक्षा ६ की करुणा कार्की दोस्रो भइन् भने कक्षा ९ कै प्रशान्त दाहाल तेस्रो भए । १२ जना प्रतियोगीहरुमध्ये विजयी भएका उत्कृष्ट ३ विद्यार्थीलाई प्रमाणपत्र प्रदान गरिएको थियो ।

विद्यार्थीका प्रश्नको जवाफ दिँदै गुरुङले समाजमा घटेका घटनाहरु नागरिककै सहायतामा मात्र छिटो पत्ता लगाउन सकिने बताउँदै प्रहरीको काम, कर्तव्य र अधिकारका बारेमा पनि प्रष्ट पारे । उनले हरेक घटना समाजबाटै उत्पन्न हुने बताउँदै विद्यालयदेखि नै विद्यार्थीलाई शान्ति, सुरक्षा र सामाजिक अपराधबारे सचेतनामूलक शिक्षा प्रदान गरि सचेत एवं सजग नागरिकका रुपमा विकास गर्नुपर्नेमा जोड दिए ।

यस्तै, धन्यन्तरी समाजका अध्यक्ष कल्याणध्वज खड्काले सामाजिक अपराध न्यूनिकरणमा शैक्षिक संस्थाहरुको महत्वपूर्ण भूमिका रहने बताए । समाजसँग जोडिएका संवेदनशिल विषयवस्तुलाई व्यवहारिक ढंगले समेट्दै विद्यार्थीहरुको पठनपाठनमा मात्र नभएर समग्र वृत्तिविकासमा पनि ध्यान दिनुपर्नेमा जोड दिए ।

सेन्ट जर्ज स्कुलका अध्यक्ष प्रह्लाद दाहालले विद्यार्थीको बोल्ने क्षमताको विकाससँगै समाज र सामाजिक सुरक्षाप्रति चेतना तथा चासो बढाउने उद्देश्यले वक्तृत्वकला प्रतियोगिताको आयोजना गरेको बताए ।

सामुदायिक सेवा केन्द्र कालोपुलका प्रहरी ददिराम ज्ञवालीले सञ्चालन गरेको कार्यक्रममा आयोजक विद्यालयका प्रधानाध्यापक मेघराज बजगाई, सामुदायिक सेवा केन्द्रका सचिव शान्तध्वज खड्का, सुनगाभा वाटिका नेपालकी अध्यक्ष बिना बस्नेत, सामाजिक अभियन्ता लक्ष्मण शर्मालगायत अतिथि रहेका थिए ।

प्रकाशित मिति: बुधबार, कात्तिक २७, २०७६ १८:१९