बयान फेर्दै सरकारी साक्षी, जुलुस निकाल्दै नेता कार्यकर्ता

A+ A A-

रौतहटको राजपुरमा बम विस्फोटनका घाइतेलाई जिउँदै जलाएर हत्या गरेको अभियोगमा मोहम्मद अफ्ताव आलमविरुद्ध जिल्ला अदालतमा थुनछेक बहस चलिरहँदा प्रत्यक्षदर्शीले धमाधम बयान फेर्न थालेका छन् ।

गत २०६४ सालमा भएको संविधानसभाको निर्वाचनको अघिल्लो दिनको विस्फोटको घटनाका एक प्रत्यक्षदर्शी तथा घाइते गौरीशंकर राम चमारले बयान फेर्दै अदालत पुगेपछि प्रहरीले पक्राउ गरेको हो ।

न्यायाधीश दीपक ढकालको इजलासमा बहस चलिरहेका बेला उनीविरुद्ध बयान दिने भनिएका चमारले बम विस्फाेटनबारे आफूलाई कुनै जानकारी नभएको भन्दै उनी अदालतमा पुगेका थिए ।

आलमका वकिलको साथमा जिल्ला अदालत छिर्नै लाग्दा चमारलाई रौतहट प्रहरीले पक्राउ गरेको छ । सरकारी साक्षी बनेर अदालतमा उपस्थित भएका चमारले बयान फेरेपछि उनलाई प्रहरीले पक्राउ गरी हिरासतमा लिएको छ ।

राजपुरमा भएको बम विस्फाेटनमा घाइते भएका चमार सरकारी साक्षी हुन् । उनले आफू बमले नभएर स्टोभ पड्केर घाइते भएको कागजात पेस गरेका छन् ।

यसअघि विस्फोटनपछि इँटाभट्टामा हालेर जिउँदै मारिएका भनिएका ओसी अख्तर विदेशमा रहेको भन्दै उनकी पत्नी अमना खातुनले जिल्ला अदालत रौतहटमा निवेदन दिएकी थिइन् ।

२३ जनालाई जिउँदै इँटाभट्टामा हालेर हत्या गरेको अभियोगमा नेता आलमविरुद्ध बयान दिन पुगेकी अमनाले आलमकै पक्षमा बयान दिएकी थिइन् ।

Grammar School — बयान फेरेकी अमना । तस्वीर साैजन्यः पत्रकार रमेश तिमल्सिना

प्रहरी र जिल्ला सरकारी वकिलको कार्यालयमा पति ओसी अख्तरलाई आलमले जिउँदै इँटा भट्टामा हालेर मारेको बयान दिएकी उनले अचानक जिल्ला अदालतमा बयान फेर्दै लिखित निवेदन दिएकी थिइन् ।

इन्सेक प्रतिवेदन झुटोः केसी

यता पूर्वमन्त्री आलमको बचाउ गर्दै नेपाल बार एसाेिसएसनका पूर्वअध्यक्ष अधिवक्ता शेरबहादुर केसीले आलमविरुद्ध इन्सेकले तयार पारेको प्रतिवेदनको कुनै औचित्य नभएको बताएका छन् ।

सोमबार जिल्ला अदालत रौतहटमा आलमको तर्फबाट बहस गर्दै केसीले इन्सेकको प्रतिवेदनमा कुनै आधिकारिकता नभएको बताएका छन् । जिल्ला न्यायाधीश दिपक ढकालको इजालसमा बहस गर्दै केसीले आलमलाई राजनीतिक पूर्वाग्रहका आधारमा पक्राउ गरिएको दाबी गरे ।

मृत्यु भएका भनिएकाहरूको लुगा तथा जुत्ता परीक्षण गर्दा रगत नभेटिएको प्रमाण आएको र माटो परीक्षण गर्ने साधन नभएको भन्दै फकाइनुजस्ता तथ्यहीन प्रमाण पेस गरेर आलमलाई सरकारले सास्ती मात्र दिएको उनको दाबी छ ।

सोमबार केसी, सुनिल पोखरेल, योगेन्द्र अधिकारी, गोपाल कृष्ण घिमिरे र भूषण घिमिरे गरी पाँच जना वकिलले बहस गरे । आलमको तर्फबाट ३४ जना वकिलले वकालतनामा दर्ता गराएका छन् ।

गौरमा कांग्रेस नेताको मौन प्रदर्शन

आलमका समर्थकहरूले गौरमा विशाल मौन जुलुस प्रदर्शन गरेका छन् । जिल्ला अदालत रौतहट गौरमा बहस चलिरहँदा उनका समर्थकहरूले गौरमा आज दोस्राे पटक मौन जुलुस निकालेका हुन् ।

गाैरकाे जुलुसमा सहभागीहरू । तस्वीर साैजन्यः पत्रकार रमेश तिमल्सिना

नेता आलमको निःशर्त रिहाइको माग गर्दै मौन जुलुस निकालिएको जुलुसमा सहभागी नेपाली कांग्रेसका महाअधिवेशन प्रतिनिधि मुकेश गिरीले बताए । बीपी चोकबाट निस्केको जुलुस जिल्ला अदालत हुँदै गौर भन्सार पुगेर टुंगिएको उनले जानकारी दिए ।

नेपाली कांग्रेसको केन्द्रीय तहका नेताहरूले कानुनलाई सहयोग गर्न भनेपछि यहाका नेपाली कांग्रेसका नेता तथा कार्यकर्ताले मौन जुलुस प्रदर्शन गरेका हुन । २७ चैत २०६४ मा रौतहटको राजपुरमा बम विस्फाेटनको मुख्य दोषी भन्दै १२ वर्षपछि रौतहट प्रहरीले गत २६ असोजमा आलमलाई गौरबाट पक्राउ गरेको थियो ।

प्रकाशित मिति: सोमबार, कात्तिक २५, २०७६ १९:०२