बागलुङ टुक्राउने सहमति, घर्तीले वाम उम्मेद्वारलाई सघाउने

A+ A A-

आगामी १४ मंसिरमा बागलुङ क्षेत्र नं २ (ख) मा हुने उप–निर्वाचनका लागि स्वतन्त्र उम्मेदवारी दिएका नेकपाका नेता शेरमान घर्ती वाम गठबन्धनका उम्मेदवारलाई सघाउन तयार भएका छन् ।

नेकपा र राष्ट्रिय जनमोर्चाको तालमेलबाट असन्तुष्ट बनेका घर्तीले स्वतन्त्र उम्मेदवारी दिएका थिए ।

दलहरुको सहमति बिपरित घर्तीले उम्मेदवारी दिएर सम्पर्कबिहीन भएपछि नेकपाका नेता कार्यकर्ता तनाबमा परेका थिए । ढोरपाटन नगरपालिकाका मेयर देवकुमार नेपालीको पहलमा मनोनयन फिर्ता लिन तयार भएका शेरमानलाई हेलिकप्टर मार्फत सदरमुकाम ल्याइए पनि उम्मेदवारी फिर्ता गर्ने समय सकिएका कारण उमेदवारी फिर्ता भने हुन सकेन ।

नेकपाको अन्तिम कसरत पछि घर्तीले पत्रकार सम्मेलन गरेर बागी उम्मेदवारी फिर्ता लिएको बताउँदै वाम उम्मेदवारलाई सघाउने प्रतिबद्धता व्यक्त गरेका छन् ।

उनको उम्मेदवारी दर्तापछि फिर्ता गराउन लागि परेको नेकपाले बागलुङको पश्चिम क्षेत्रलाई छुट्टै जिल्ला बनाउने सहमति गरेपछि घर्तीले पत्रकार सम्मेलन मार्फत वाम उम्मेदवारलाई सघाउने घोषणा गरेका हुन् ।

‘पार्टीमा बिमती थियो, खण्ड बागलुङको मेरो मागलाई सम्बोधन गर्छाैं भनेपछि म यो निणर्यमा पुगेँ,’ पत्रकार सम्मेलनमा घर्तीले भने, ‘दुई तिहाईको सरकारले मेरो माग पुरा गर्न सक्छ ।’

घर्ती राज्यको पुनः संरचना हुने बेला देखिनै बागलुङलाई टुक्राएर दुई जिल्ला बनाउने पक्षधर अभियान्ता हुन् ।

नेकपाका जिल्ला अध्यक्ष इन्द्रलाल सापकोेटाले बागी उम्मेदवारी दिएका घर्तीको मागका सम्बन्धमा निर्वाचनपछि पार्टीको जिल्ला र केन्द्रीय तहमा छलफल गर्ने गरी उम्मेदवारी फिर्ता लिइएको बताए ।

‘वाम गठबन्धन तोड्नका लागि भित्र र बाहिरबाट अनेक षड्यन्त्र भइरहेका थिए, त्यसकै अंशका रुपमा यो घटना भएको हो,’ सापकोटाले भने, ‘शेरमान जी लामो समयदेखि वाम आन्दोलन र अभियानमा क्रियाशिल हुनुहुन्छ, उहाँको पार्टीले ढिलोचाडो त्याग र योगदानको कदर गर्छ ।’

उनले पश्चिम क्षेत्रका नेता घर्तीसहित त्यस क्षेत्रका बासिन्दाका लामो समयदेखिको माग रहेकाले यो विषयमा केन्द्रीय नेताहरुसँग पनि छलफल गर्ने प्रतिवद्धता जनाएको सापकोटा बताए ।

प्रकाशित मिति: सोमबार, कात्तिक २५, २०७६ ११:२६