गणेशमानलाई साक्षी राखेर कास्की कांग्रेसले थाल्यो चुनावी अभियान

A+ A A-

आगामी मंसिर १४ गते हुने कास्की–२ को उपनिर्वाचनको पहिलो चरणमा नेपाली कांग्रेस कास्कीले पार्टीका संस्थापक नेता एवं लौह पुरुष गणेशमान सिंहलाई साक्षी राखेर चुनावी अभियान शुभारम्भ गरेको छ । कांग्रेस उम्मेदवार खेमराज पौडेललगायतका नेताहरूले पोखराको नालामुखस्थित गणेशमानको शालिकमा माल्यार्पण गरी अभियान शुभारम्भ गरेका हुन् ।

संयोगले गणेशमानको १०५औं जन्मजयन्ती पनि आइतबार नै परेको थियो । त्यसपश्चात् कांग्रेस उम्मेदवार पौडेलसहित पोखरा–४, ८ र ९ वडामा घरदैलो कार्यक्रम गरिएको कास्की कांग्रेसले जनाएको छ । कास्की कांग्रेसले पोखरा– ४ मा यज्ञबहादुर थापा, ८ मा वीरेन्द्रनारायण विजुक्छे र ९ मा तारानाथ रानाभाटलाई संयोजक तोकेको छ ।

घरदैलो कार्यक्रमका क्रममा मतदाताको घरआँगनमा पुगेका उम्मेदवार पौडेललाई मतदाताले गुरु भन्दै सम्मानभाव प्रकट गरेका थिए । कतिपय मतदाताले ‘लामो समयपछि गुरुसँग भेट्न पाइयो, निकै खुशी लाग्यो, विजयको शुभकामना गुरु !’ भन्दै सम्मान गरेका थिए । त्यस अवसरमा नजिकबाट चिनिएका मतदाता र आफूले पढाएका विद्यार्थी भेट्दा उम्मेदवार पौडेल भावुकसमेत बनेका थिए ।

पौडेलका पोखरा– ८ का १ विद्यार्थी ‘गुरुको भार चुक्ता गर्ने अवसर बल्ल प्राप्त भएको छ, म जुनसुकै सहयोग गर्न पनि तयार छु’ भन्दै अगाडि आउँदा पौडेल ती विद्यार्थीलाई अँगालो हाल्दै भक्कानिएका थिए ।

११ वटै वडामा सम्पर्क कार्यालय

कांग्रेसले कास्की–२ अन्तर्गत पोखराका ११ वटै वडामा चुनावी प्रचार समितिको सम्पर्क कार्यालय स्थापना गरेको छ । आइतबार एकैसाथ पोखराका ११ वटै वडामा सम्पर्क कार्यालय शुभारम्भ गरिएको हो ।

पोखरा– ४ मा संयोजक पूर्वमन्त्री यज्ञबहादुर थापा, वडा नं. १७ मा पार्टी सभापति कृष्ण केसी र वडा नं १६ मा स्वयम् उम्मेदवार खेमराज पौडेलले प्रचार कार्यालयको उद्घाटन गरेका हुन् ।

वडा नं १६ मा आयोजित सभालाई उम्मेदवार खेमराज पौडेलले सम्बोधन गरेका थिए । सो क्रममा उनले देशको राजनीतिलाई सदाचारतर्फ उन्मुख गराउन आफ्नो उम्मेदवारी भएको बताए । उनले यो चुनावमा आफूले जितेर सरकारमा कुनै फरक नपरे पनि भ्रष्टीकरणमा लागेको राजनीतिलाई गतिलो सन्देश सिकाउन सकिने बताए ।

उनले आफू उमेरले पाको भए पनि विचारले पाको नभएको बताउँदै जिन्दगीभरिको त्याग र तपस्याअनुसार पार्टीले विश्वास गरेर टिकट दिएको बताए । पौडेलले वर्तमान सरकारले जनहितमा काम गर्न नसकेको बताउँदै जनताले कांग्रेसलाई मतदान गर्ने विचार व्यक्त गरे ।

प्रकाशित मिति: आइतबार, कात्तिक २४, २०७६ १८:४१