कास्कीमा नेकपाको चुनावी अभियान तीव्र, ११ वटै वडामा चुनाव परिचालन कार्यालय

A+ A A-

आगामी मंसिर १४ गते हुने कास्की–२ को उपनिर्वाचन आफ्नो पक्षमा पार्न नेपाल कम्युनिस्ट पार्टी (नेकपा) ले चुनावी अभियानलाई तीव्र पारेको छ । नेकपाले उम्मेदवारसहित घरदैलो कार्यक्रमसँगै चुनाव प्रचारलाई व्यवस्थित र प्रभावकारी बनाउन क्षेत्र नं. २ का ११ वटै वडामा चुनाव परिचालन कमिटीको कार्यालय स्थापना गरेको छ ।

पोखरा महानगरका ४, ७, ८, ९, ११, १५, १६, १७, २०, २१, ३३, मा चुनाव परिचालन वडा कमिटीको कार्यालय स्थापना गरेको नेकपा चुनाव प्रचारप्रचार उपसमितिका संयोजक त्रिभुवन पौडेलले जानकारी दिए । उनका अनुसार आइतबार बिहान चुनाव हुने सबै वडामा चुनाव परिचालन कार्यालय स्थापना गरिएको हो ।

वडा कमिटीको कार्यालय स्थापनासँगै चुनावी प्रचार अभियान टोल/टोलमा पुग्ने नेकपाले बताएको छ । नेकपाले चुनाव लक्षित गरेर २२ कात्तिकका पोखरा सभागृहमा कार्यकर्ता प्रशिक्षण कार्यक्रम गरिसकेको छ । कार्यक्रममा नेकपाका अध्यक्ष पुष्पकमल दाहाल प्रचण्ड र महासचिव विष्णु पौडेलले प्रशिक्षण दिएका थिए ।

उम्मेदवार विद्या भट्टराईसहित वडा नम्बर १५ र ३३ मा घरदैलो कार्यक्रम सञ्चालन भएको छ । यसैगरी, २१ वडामा अहिले उम्मेदवार भट्टराईसहित घरदैलो कार्यक्रम भइरहेको छ । उम्मेदवार भट्टराईसहित नेकपा गण्डकीका सहइन्चार्ज खगराज अधिकारी, पोखरा महानगर कमिटीका अध्यक्ष दीपक पौडेललगायतका नेताहरू पनि घरदैलो कार्यक्रममा सहभागी छन् ।

२० वडाको भलाम र मौजामा पनि चुनाव परिचालन कमिटी स्थापना भएको छ । साविकका भलाम गाविस र मौजा गाविसको दुवै ठाउँमा चुनाव परिचालन कमिटीको कार्यालय स्थापना गरिएको हो ।

भलामको कार्यालयको महानगर कमिटीका सचिव विश्वप्रकाश लामिछाने र मौजा कार्यालयको साविक मौजा गाविसका पूर्वअध्यक्ष चित्रबहादुर गुरुङले उद्घाटन गरेको उपसमिति संयोजक पौडेलले बताए ।

रवीन्द्र अधिकारीले तीन पटक चुनाव जितेर ह्याट्रिक गरेको उक्त क्षेत्रमा त्यही विरासतलाई कायम गर्ने गरी नेकपा चुनावी प्रचार अभियानमा जुटेको छ । गत २०७४ को प्रतिनिधिसभा चुनावमा नेपाली कांग्रेसका उम्मेदवार देवराज चालिसेलाई ८ हजार ५ सय ४२ मतले पराजित गरेका थिए ।

गत फागुन १५ गते हेलिकोप्टर दुर्घटनामा अधिकारीको निधन भएपछि हुन लागेको उपनिर्वाचनमा जितको मतान्तरलाई अझ बढाउने गरी चुनावी रणनीति बनाएर अगाडि बढेको नेकपाले जनाएको छ ।

उदीयमान नेता गुमाउनुको शोकलाई शक्तिमा बदलेर अधिकारीको अधुरो सपना पूरा गर्न उनको उत्तराधिकारीको रूपमा पत्नी विद्यालाई चुनावी मैदानमा उतारेर मतान्तरलाई १३ हजार पुर्‍याउने लक्ष्यसहित चुनावी मैदानमा उत्रिएको नेकपा कास्कीका अध्यक्ष कृष्ण थापाले दाबी गरेका छन् ।

प्रकाशित मिति: आइतबार, कात्तिक २४, २०७६ १६:०६