मोनो रेल चढेर ऊर्जामन्त्रीले गरे भेरी–बबई डाइभर्सनको निरीक्षण

A+ A A-

ऊर्जा, जलस्रोत तथा सिँचाइ मन्त्री वर्षमान पुनले राष्ट्रिय गौरवको आयोजनाका रूपमा रहेको भेरी–बबई ड्राइभर्सन आयोजनाको सुरुङ मार्गको निरीक्षण मोनो रेल चढेर गरेका छन् । बुधबार बिहान १२.२ किलोमिटर लामो सुरुङ मार्ग मोनो रेल चढेर निरीक्षण गरेका हुन् ।

सुरुङ मार्गको निकास रहेको भेरीगंगा नगरपालिकाको हात्तीखालबाट मोनोरेल चढेर मन्त्री पुन चिप्ले पुगेका थिए ।

सुरुङ मार्गमा एक घण्टा लगाएर निरीक्षण गरेका मन्त्री पुनले नेपालमै पहिलो पटक टनेल बोरिङ मेसिन (टीबीएम) मार्फत निर्माण सम्पन्न गरिएको राष्ट्रिय गौरवको भेरी–बबई बहुउद्देश्यीय डाइभर्सन आयोजनाको सुरुङ मार्गको काम सकिएकाले आयोजनाका अन्य कामलाई तीव्रता दिन आग्रह गरेका थिए ।

मन्त्री पुनले राष्ट्रिय गौरवका आयोजनाहरू प्रधानमन्त्री केपी शर्मा ओलीको प्रत्यक्ष निगरानीमा रहेका कारणले बजेटको अभाव नहुने बताए । ‘राष्ट्रिय गौरवका आयोजना प्रधानमन्त्रीको निगरानीमा नै रहेका छन्,’ उनले भने, ‘यी आयोजनामा बजेट र जनशक्तिको कमी हुन दिइँदैन ।’

सिँचाइ, विद्युत् उत्पादन गर्ने लक्ष्यसहित निर्माण भइरहेको भेरी–बबई डाइभर्सन आयोजनाको बाँध, विद्युत् गृहलगायतका संरचनाहरू सँगसँगै निर्माण गर्ने प्रक्रिया सुरू गरिएको उनले बताए । ‘यो आयोजनाको सबै काम एकैचोटि निर्माण भइरहेका छन्,’ उनले भने, ‘कामको तीव्रता नै यसको मुख्य आधार हो ।’

भेरी बबई आयोजनाबाट ४८ मेगावाट विद्युत् उत्पादन गर्ने लक्ष्य राखिएको र यसका लागि खात्तिखादमा जनताको जलविद्युत आयोजनाअन्तर्गत छुट्टै कम्पनी दर्ता गरेर उत्पादनको काम थालनी गरिने मन्त्री पुनले बताए । ‘जनताको जलविद्युत् लगानीअन्तर्गत राखेर छुट्टै कम्पनी निर्माण गरिनेछ, ’ उनले भने, ‘विद्युत् उत्पादनको काम पनि एकसाथ अगाडि बढाइनेछ ।’

प्रकाशित मिति: बुधबार, कात्तिक २०, २०७६ १७:४९