आलम पक्राउ परेपछि हत्याका अन्य ३ पुराना मुद्दा पनि ब्युँतिए

A+ A A-

रौतहटको राजपुर बमकाण्डका आरोपी सांसद अफताव आलम पक्राउ परेसँगै जिल्लामा नसुल्झिएका अन्य तीन हत्या मुद्दामा पनि अनुसन्धान हुनुपर्ने माग उठ्न थालेको छ । मृतकका परिवारजन र स्थानीयले न्यायका लागि प्रहरी गुहार्न थालेका छन् ।

२०६५ कात्तिक ७ मा प्रेमपुकार गोनाही–४ का ३५ वर्षीय शिक्षक सुनीलप्रसाद यादवको विद्यालयमै गोली हानेर हत्या भयो । प्रहरीले गोनाही–८ का वैकुण्ठ ठाकुर, रामजी महतो र रामानन्द राउत चौरसियालाई हत्यामा संलग्न भएको आशंकामा पक्राउ गरेपनि लगत्तै छाडेको थियो ।

२०६७ जेठ १९ मा रौतहटकै गरुडामा बैरीया–३ का राजाराम साहको छोरीको विवाहमा बन्दुक पड्काउँदा १४ वर्षीय सुनिलकुमार साहको मृत्यु भएको थियो । छानबिन गर्न प्रहरी निरीक्षक राजु अधिकारीको टोली खटाए पनि अनुसन्धान भएर मुद्दा नचली घटना सेलायो ।

२०६८ असार २३ गते जिल्ला अदालत नजिकैको सडकमा कुस्तीका राष्ट्रिय खेलाडी उपेन्द्रदास वैरागीको गोली हानी हत्या गरिएको थियो । प्रेमपुर गोनाही–१ का ५० वर्षीय बैरागीले आठौं साफ खेलकुदमा कास्य पदक जितेका थिए ।

देशका लागि पदक जितेका खेलाडीको हत्याकाण्डले निकै चर्चा पाए पनि हत्यारा पक्राउ परेनन् । हत्याको आशंकामा पक्राउ परेका प्रेमपुर गोनाही–४ का जगरनाथ राय यादव र सर्फलाल महतो केही दिनमै रिहा गरिए ।

तत्कालिन प्रहरीले अनुसन्धानमा हेल्चेक्राइँ नगरेर हत्यारालाई उम्किन दिएको पीडित परिवारको आरोप छ । खेलकुदका विभिन्न संघसंस्थाले हत्यारा पक्राउ गर्न, वैरागीलाई शहिद घोषणा गर्न र उनको परिवारलाई क्षतिपूर्ती दिन माग गरेका थिए । तर, हत्या भएको आठ वर्षसम्म पनि न अनुसन्धान अगाडि बढ्न सकेको छ न त परिवारप्रति राज्य जिम्मेवार नै भएको छ ।

देशको लागि पदक जितेर गोरखा दक्षिणबाहु पदकसमेत पाएका खेलाडीको हत्या हुँदा पनि प्रहरीले राम्रोसँग अनुसन्धान नगरेर घाउमा नुनचुक छरेको मृतक वैरागीकी पत्नी रामकुमारी देवी यादवल बताइन् ।

‘घरमुलीकै हत्या भएपछि परिवार आर्थिक संकटमा पर्ने नै भयो,’ उनी भन्छिन्, ‘सरकारले केही आर्थिक सहयोग नगरेपनि हत्यारालाई समातेर कानुनी कारवाही गरिदिए मनलाई राहत त हुने थियो ।’

रौतहटका प्रहरी उपरिक्षक भुपेन्द्र खत्री सबै घटनाको अनुसन्धान हुनुपर्ने विषयमा सचेत रहेको बताउँछन् । ‘अहिले सांसद अफताव आलमको मुद्दाका कारण सबै व्यस्त छौं,’ उनले भने, ‘यो मुद्दा एउटा तहमा पुगेपछि क्रमशः अन्य सबै घटनाको गम्भीर अनुसन्धान गर्नेछौं ।’

४ अभियुक्त अझै फरार

जिउँदै मान्छेलाई इँटाभट्टामा पोलेको आरोपमा नेपाली कांग्रेसका नेता तथा पुर्वमन्त्री अफताव आलम पक्राउ परेपनि अन्य ४ जना अभियुक्तहरु भने अझै फरार छन् । बम विष्फोटमा परि घाइते भएकालाई जिउँदै जलाएको आरोपमा पुर्वमन्त्री आलम सहित ४ जना माथि किटानी जाहेरी परेको छ ।

किटानी जाहेरी परेकामध्ये ४ जना अझै फरार रहेको जिल्ला प्रहरी कार्यालय रौतहटका प्रहरी नायव उपरिक्षक नवीन कार्कीले जानकारी दिए । फरार हुनेहरुमा आलमका सहोदर भाई महताव आलम, स्थानीय शेख भदई, मोबीन आलम र शेख सराज रहेको नायव उपरिक्षक कार्कीले जानकारी दिए । फरार अभियुक्तहरुको तीव्ररुपमा खोजी कार्य भइरहेको उनले विश्वास दिलाए ।

पुर्वमन्त्री आलमलाई पहिलो संविधान सभाको निर्वाचनको अघिल्लो दिन २०६४ चैत्र २७ गते रौतहटको राजपुर फरदवामा बम विष्फोट गराई घाइते भएकाहरुलाई जिउँदै इँटाभट्टामा जलाएको आरोपमा गत असोज २६ गते रौतहट प्रहरीले प्रक्रउ गरेको थियो ।

पहिलोपटक अनुसन्धानका लागी ७ दिनको म्याद थपेको र फेरी ५ दिन पुनः म्याद थप गरी प्रहरीले अनुसन्धान गरिरहेको छ । अनुसन्धानका लागि आलमलाई कात्तिक ८ गतेसम्म हिरासतमा राख्न जिल्ला अदालत रौतहटले म्याद थप गरेको हो ।

प्रकाशित मिति: बुधबार, कात्तिक ६, २०७६ २१:२८