मंसिर ५ र ६ गते ऊर्जा सम्मेलन, आधा दर्जन परियोजनामा लगानी सम्झौता हुने

A+ A A-

स्वतन्त्र ऊर्जा उत्पादकहरूको संस्था नेपाल (इप्पान) ले मंसिर ५ र ६ गते काठमाडौंमा ऊर्जा सम्मेलन आयोजना गर्ने भएको छ । सम्मेलनमा छिमेकी देशदेखि शक्तिराष्ट्रसम्मका ७ सय सहभागी हुनेछन् ।

ऊर्जा क्षेत्रमा भएको परिस्थितिजन्य परिवर्तन, देखिएका सुधार र देशभित्र तथा बाहिर देखिएका क्षेत्रीय विद्युत व्यापारको अवसर तथा चुनौतीहरूलगायतका विषयमा चर्चा गर्न इप्पानले पावर समिट २०१९ आयोजना गर्न लागेको हो । समिटको मुख्य नारा पावरिङ द एसिएन सेन्चुरी तय भएको छ ।

सम्मेलनलाई नेपाल सरकारको ऊर्जा, जलस्राेत तथा सिंचाइ मन्त्रालयको अभिभावकत्व प्राप्त भएको इप्पानले जानकारी दियो । यस्तै, राष्ट्रिय योजना आयोग, लगानी बोर्ड, नेपाल विद्युत प्राधिकरण, जलविद्युत लगानी तथा विकास कम्पनी जस्ता सरकारी निकायहरूसँग सहकार्य गरिएको छ ।

क्षेत्रीय विद्युत व्यापारको सम्भावनाको छलफल अगाडि बढाउन छिमेकी मुलुकहरूको व्यापक सहभागिताका लागि ऊर्जा सम्मेलनलाई नेपालमा रहेको भारतीय दूतावास र बंगलादेशी दूतावासबाट महत्त्वपूर्ण सहयोग तथा समन्वय भएको इप्पानको भनाइ छ ।

सम्मेलनमा संसारभरबाट ७ सयभन्दा बढी सहभागी हुनेछन् । यसमध्ये भारत, बंगलादेश तथा चीनबाट ठूलो संख्यामा व्यक्ति तथा संघसंस्थाको सहभागिता रहने अपेक्षा गरिएकाे छ । यस्तै, भुटान, नर्वे, दक्षिण कोरिया, क्यानडा, नेदरल्याण्ड, बेलायत, संयुक्त राज्य अमेरिका तथा जापानबाट समेत उत्साहजनक सहभागिता हुने जानकारी प्राप्त भइसकेको आयोजकले जानकारी दियो ।

सम्मेलनमा क्षेत्रीय विद्युत व्यापार, विद्युत बजार, विद्युत बजार नियमन, वित्तीय व्यवस्थापन, ऊर्जाको दिगो विकास, संघीयतामा ऊर्जा परियोजनाहरू संचालन र सहजीकरण, ऊर्जामा आवश्यक लगानी तथा आयोजना प्रदर्शनीजस्ता विषयहरू रहनेछन् ।

कार्यक्रममा नेपालका प्रधानमन्त्रीलाई प्रमुख अतिथिका लागि आमन्त्रण गरिएको छ भने ऊर्जा, जलस्राेत तथा सिंचाइमन्त्री र अर्थमन्त्रीको आतिथ्यता र प्रस्तुति रहनेछ ।

अन्य विशिष्ट अतिथिहरूमा भारतका जलशक्ति मन्त्रालयका मन्त्री र बंगलादेशका शक्ति, ऊर्जा तथा खनिज संशाधन राज्यमन्त्रीको सहभागिता रहनेछ । नेपाल, भारत, बंगलादेश, चीन, नेदरल्यान्ड, नर्वेका निजी तथा सरकारी संस्थाका प्रतिनिधिहरू तथा अन्य विज्ञहरूले प्रस्तुति गर्ने तय भएको छ ।

प्रमुख वक्ताहरूमा राष्ट्रिय योजना आयोगका उपाध्यक्ष, विद्युत नियमन आयोगका अध्यक्ष, ऊर्जा, जलस्राेत तथा सिंचाइ मन्त्रालयका सचिव, नेपाल विद्युत प्राधिकरणका कार्यकारी निर्देशक, नेपाल लगानी बोर्डका प्रमुख कार्यकारी अधिकृत, नेदरल्याण्ड्सको विकास बैंक एफएमओका प्रमुख लगानी अधिकारी, एसियाली पूर्वाधार विकास बैंकका निर्देशक, इण्डियन इनर्जी एक्सचेन्जका कार्यकारी निर्देशक, विश्व बैंक समूहअन्तर्गतको अन्तर्राष्ट्रिय वित्त निगम (आईएफसी) का नेपाल प्रमुख, अमेरिकी सहयोग संस्था यूएसआईडीका प्रतिनिधि, बेलायती सहयोग संस्था डीएफआईडीका प्रतिनिधि, नर्वेजियन इनर्जी रेगुलेटरी अथोरिटीका निर्देशकलगायत रहनेछन् ।

सम्मेलनमा भारत र बंगलादेशका ऊर्जा क्षेत्रमा संलग्न पीटीसी इन्डिया, सतलज जलविद्युत निगम, नेसनल हाइड्रोपावर कम्पनी इन्डिया, जीएमआर, सेन्ट्रल इलेक्ट्रिसिटी अथोरिटी कमिसन इन्डिया, बंगलादेश पावर डेभलपमेन्ट बोर्ड र अन्तराष्ट्रिय नोर्डिक पावर पुलका प्रतिनिधिको उपस्थिति र प्रस्तुति रहने इप्पानले बताएकाे छ ।

सम्मेलनलाई नेपाल उद्योग वाणिज्य महासंघ, नेपाल उद्योग परिसंघ, नेपाल बैंकर्स एसाेसिएसन, नेपाल निर्माण व्यवसायी महासंघ, नेपाल टनेलिङ एसाेसिएसन तथा नेपाल इन्जिनियर्स एसाेसिएसनलगायतले सघाएका छन् ।

प्राविधिक सत्रबाहेक सम्मेलनमा बिजनेस टु बिजनेस मिटिङलाई प्रोत्साहन दिई लगानी तथा व्यापारमा टेवा पुर्याउने आधा दर्जनभन्दा बढी विद्युत व्यापार, वातावरणीय उत्तम अभ्यासहरू तथा समावेशी ऊर्जाक्षेत्रसम्बन्धी सम्झौताहरू हुने अपेक्षा राखिएको इप्पानले जानकारी दियो । यस्तै, ऊर्जा परियोजना निर्माण स्थलमा मागअनुसार भ्रमणको व्यवस्था गरी सहभागीहरूले चाहेको अवस्थामा विभिन्न आयोजनाहरूको स्थलगत भ्रमण गरी नेपालमा ऊर्जा क्षेत्रमा भइरहेको विकासको प्रत्यक्ष अवलोकन गराउने तयारी इप्पानको छ ।

प्रकाशित मिति: बुधबार, कात्तिक ६, २०७६ १८:५०