बलोन डि’ओरको प्रारम्भिक मनोनयन सार्वजनिक

A+ A A-

बलोन डि’ओर को प्रारम्भिक नोमिनेसन सार्वजनिक भएको छ । सोमबार राती ३० खेलाडी सम्मिलित प्रारम्भिक सूची सार्वजनिक भएको हो । प्रारम्भिक सूचीमा पोर्चुगल तथा युभेन्टसका स्टार स्ट्राइकर क्रिस्टियानो रोनाल्डो, अर्जेन्टिना तथा बार्सिलोनाका स्टार लियोनल मेसी र नेदरल्यान्ड्स तथा लिभरपुलका भिर्गिल भान डाइक परेका छन् ।

रोनाल्डो, मेसी र भान डाइक यस वर्ष तेस्रोपटक प्रतिष्ठित अवार्डका लागि भिड्नका लागेका हुन् । यसअघि फिफा वर्ष खेलाडी र युइएफए बेस्ट प्लेयरका लागि पनि यी तीन खेलाडीबीच नै प्रतिस्पर्धा भएको थियो । जसमध्ये फिफा वर्ष खेलाडीमा मेसी र युइएफए बेस्ट प्लेयरमा भान डाइकले बाजी मारेका थिए ।

फ्रेन्च फुटबल म्यागेजिनले विश्वभरका उत्कृष्ट खेलाडीलाई प्रदान गर्ने बलोन डि’ओरको प्रारम्भिक नोमिनेसनमा इंग्लिस क्लब लिभरपुलका ७ जना खेलाडी परेका छन् भने म्यानचेस्टर सिटीका ५ खेलाडीले स्थान बनाएका छन् ।

लिभरपुलका भान डाइक, मोहम्मद सलाह, सादियो माने, रोबर्टो फिर्मिन्हो, अलेक्जेन्डर आर्नोल्ड, जर्जिनिओ विजनाल्डम र एलिसन बेकर रहेका छन् भने सिटीका रहीम स्टर्लिङ, रियाद माहरेज, केभिन डे’ब्रुन, बर्नान्र्डो सिल्भा र सर्जियो अगुएरो परेका हुन् ।

यसैगरी स्पेनिस जाइन्ट बार्सिलोनाबाट मेसीसँगै फ्र्यांकी डी योङ, एन्टोइन ग्रिजम्यान र टेर स्टेगेन परेका छन् । यस्तै, रियल मड्रिडबाट इडेन हाजार्ड मनोनयन हुँदा आर्सनलका पिएरे एम्रिक औबामेयाङ पनि बलोन डि’ओरका लागि मनोनित हुन सफल भए ।

यस्तै, एट्लेटिको मड्रिडका पोर्चुगिज युवा स्ट्राइकर जुअ फेलिक्स, युभेन्टसका म्याथिस डी लिट, टोटेनह्यामका ह्युगो लोरिस र सन ह्युङ मिङ तथा पीएसजीका किलियन एम्बाप्पे र मार्किन्होस पनि नोमिनेसमा परेका छन् ।

यता पिएसजीका नेयमार, म्यानचेस्टर युनाइटेडका पल पोग्बा, टोटेनह्यामका ह्यारी केन र गत वर्षका बलोन डि’ओर विजेता रियल मड्रिडका लुका मोड्रिच प्रारम्भिक सूचीमा समेत अँटाउन सकेनन् ।