महरामाथि सूक्ष्म अनुसन्धान, प्रहरीले थाल्याे डीएनए परीक्षणकाे प्रक्रिया

A+ A A-

संसद सचिवालयकी कर्मचारी रोशनी शाहीलाई बलात्कार गर्न खोजेको र नमान्दा कुटपिट गरेको आरोपमा पक्राउ परेका निवर्तमान सभामुख कृष्णबहादुर महरामाथिको अनुसन्धानलाई बलियो बनाउन प्रहरी वैज्ञानिक प्रमाण संकलनको प्रक्रियामा लागेको छ ।

यसका लागि प्रहरीले महराको डीएनए परीक्षण गर्ने भएको छ । सामान्यतः रगत, जरासहितको रौ‌, हड्डी, पसिना र वीर्यबाट नेपालमा डीएनए परीक्षण हुने गरेको छ ।

यस्तै, पीडित भनिएकी रोशनी शाहीको डेराबाट बरामद रक्सीको गिलास, बोतलबाट औ‌ठाछाप परीक्षण गरिने प्रहरी स्रोतले जनाएको छ । बरामद गरिएको गिलास तथा बोतलमा महराको औ‌ठाछाप परीक्षणमा देखिएमा प्रमाण थप बलियो हुनेछ ।

पीडित महिलाको घरबाट प्रहरीले बरामद गरेको चश्मा, रक्सी–गिलास, जुत्ताको तलुवालगायत सामग्री परीक्षणका लागि केन्द्रीय विधि विज्ञान प्रयोगशाला (फरेन्सिक ल्याब) पठाए पनि रिपोर्ट आउन बाँकी छ ।

१२ असोजमा महरा रोशनी शाहीको डेरानजिक भेटिएको सीसी क्यामेराकाे फुटेज प्रहरीले संकलन गरेको छ ।

महराले भने आफू रोशनीको घर नजिकसम्म पुगेको सत्य भए पनि घरभित्र भने नगएको जिकिर बयानमा गरेका छन् । रोशनीको घरनजिक पुगेर फोन गर्दा उनको फोन नउठेपछि आफू त्यहीँबाट फर्किएको बयान महराले सरकारी वकिलको कार्यालयमा दिएका थिए ।

रोशनीको घरमा बरामद भाँचिएको चस्मा आफ्नो पुरानो चस्मा भएको दाबी महराले गरेका थिए । पुरानो चश्मा देखाएर फसाउने षड्यन्त्र गरिएको जिकिर उनले गरेका थिए ।

महराविरुद्ध उजुरी दिएकी रोशनी शाहीले पनि बयान फेर्दै महरा आफ्नो घर नै नआएको निवेदन अदालतसमक्ष प्रस्तुत गरेकी छन् । 

गत १२ असोजमा काठमाडौंको तीनकुनेस्थित आफ्नै डेरामा आएर महराले बलात्कार प्रयास गरेको भन्दै १८ असोज (फूलपाती)मा महिलाले प्रहरीसमक्ष किटानी जाहेरी दिएकी थिइन् । जाहेरीको भोलिपल्ट १९ असोजमा अदालतबाट पक्राउ पुर्जी लिएर प्रहरीले महरालाई सभामुखनिवास बालुवाटारबाट पक्राउ गरेको थियो ।

प्रकाशित मिति: मंगलबार, कात्तिक ५, २०७६ १६:३०