व्यावसायिक प्रयोजनको ग्यासको मूल्य बढाउन विकल्प खोज्दै निगम

A+ A A-

नेपाल आयाल निगमले खाना पकाउने ग्यासको दुईथरी मूल्य कायम गर्न फेरि अध्ययन थालेको छ । यसअघि घरायसी प्रयोजनको लागि एउटा रंग र औद्योगिक तथा व्यवसायिक प्रयोजनको लागि अर्काे रंगको सिलिण्डर प्रचलनमा ल्याउने निर्णय गरेर असफल भएको निगम फेरि अध्ययनमा लागेको हो ।

अन्तराष्ट्रिय बजारमा ग्यासको मूल्यमा आउने फेरबदल अनुसार नेपाली बजारमा मूल्य समायोजन गर्न नसक्ने अवस्था आएपछि निगमले विकल्प खोजेको हो । निगम अहिले विभिन्न विकल्पमा अध्ययन गरिरहेको छ ।

अन्तराष्ट्रिय बजारमा मूल्य बढ्दा घरायसी प्रयोजनको ग्यासमा मूल्य बढाउन नसक्ने अवस्था आएपनि औद्योगिक तथा व्यवसायिक प्रयोजनको ग्यासमा मूल्य समायोजन गर्न सकिने भएकोले विकल्पको खोजी भएको निगमको एलपीजी तथा एभियसन विभागका निर्देशक दीपक बरालले जानकारी दिए ।

‘यसअघि निगमले दुई रङको सिलिण्डर प्रयोगमा ल्याउने निर्णय गरे पनि कार्यान्वयन हुन नसकेको यथार्थ छ, त्यसैले कस्तो विधि र प्रक्रिया अपनाउँदा प्रभावकारी कार्यान्वयन गर्न सकिन्छ भनेर हामीले अध्ययन गरिरहेका छौं,’ निर्देशक बरालले शिलापत्रसँग भने ।

निगमले पेट्रोल, डिजेल र मट्टीतेलजस्ता पेट्रोलियम पदार्थमा स्वचालित मूल्य प्रणाली लागू गरेको छ । यस्ता पदार्थमा अन्तर्राष्ट्रिय बजारमा मूल्य बढ्दा नेपालमा पनि बढ्ने र घट्दा नेपालमा पनि घट्ने गरेको छ ।

तर, खाना पकाउने ग्यासमा भने यस्तो गरिएको छैन । खाना पकाउने ग्यासको मूल्य बढाउँदा राजनीतिक मद्दा बन्ने भन्दै राजनीतिक नेतृत्वले निगमलाई मूल्य बढाउन दिँदैन । तर, घटाउनुपर्ने समयमा भने मूल्य घट्ने गरेको छ ।

निगमले घरायसी प्रयोजनको ग्यासको मूल्य करिब स्थिर राख्ने र औद्योगिक तथा व्यावसायिक प्रयोजनको ग्यासमा मूल्य स्वचालित मूल्य कायम गर्ने उद्देश्यले अध्ययन थालेको हो । यसमा विशेष गरी २ विकल्पमा अध्ययन भइरहेको छ ।

पहिलो विकल्पको रूपमा सिलिण्डरको रङ बेग्लै गर्ने भन्ने हो । यो पहिला पनि कार्यान्वयन गर्ने भनेर निगमले निर्णय गरेको विकल्प हो । तर, राजनीतिक कारणले गर्दा निगमले यो निर्णय कार्यान्वयन गरेको छैन ।

दोस्रो विकल्पको रुपमा ग्यासको सिलिण्डर नै ठूलो–सानो बनाउने भन्ने हो । अहिले जत्रो आकारको सिलिण्डर छ, घरायसी प्रयोजनका लागि यही सिलिण्डर प्रयोग गर्ने र औद्योगिक तथा व्यावसायिक प्रयोजनका लागि अहिलेको भन्दा ठूलो आकारको सिलिण्डर प्रयोग गर्ने विकल्पमा निगमले अध्ययन गरिरहेको छ ।

‘पहिला एउटा निर्णय गरेर कार्यान्वयन गर्न नसकिएको यथार्थ हामीसँग छ, त्यसैले कार्यान्वयन गर्न सकिने विकल्प आएपछि मात्रै निर्णय कार्यान्वयनमा लाने भनेर गम्भीर अध्ययन गरिरहेका छौं, राम्रो विकल्प आएपछि कार्यान्वयनमा गइन्छ,’ निर्देशक बरालले भने ।

प्रकाशित मिति: सोमबार, कात्तिक ४, २०७६ १३:१४