बैंकका सञ्चालक समिति सदस्य ठगी आरोपमा पक्राउ

A+ A A-

सहयोगी विकास बैंक लिमिटेड सञ्चालक समितिका सदस्य दिपेन्द्रकुमार यादव (दिपु) लाई जालसाजी ठगी गरेको आरोपमा प्रहरीले पक्राउ गरेको छ ।

जिल्ला प्रहरी कार्यालय धनुषाबाट खटिएका प्रहरीले साहलाई जनकपुरधाम–८, बलवा टोलस्थित उनकै निजी निवासबाट पक्राउ गरेको धनुषाका प्रहरी उपरीक्षक शेखर खनालले जानकारी दिए ।

यादवले जनकपुरधाम– १० का लालबाबु रौनियारको धितो राखिएको जग्गा रकम चुक्ता गरिदिए पनि फिर्ता नगरेका कारण जालसाजी तथा ठगी गरी बिक्री गरेको उजुरी परेपछि जिल्ला अदालत धनुषाले पक्राउ पुर्जी जारी गरेको थियो ।

रौनियारले लामो समयसम्म पनि आफ्नो जग्गा फिर्ता नपाएपछि जग्गा दिलाइदिनका लागि अदालतमा मुद्दा दायर गरेका थिए । करिब ८ वर्षअघि रौनियारले महोत्तरीको बर्दिवासस्थित ५ कट्ठा जग्गा व्यक्तिगत रुपमा यादव कहाँ धितो राखी ५० लाख रुपैयाँ ऋण लिएका थिए ।

केही वर्षभित्रै सो ऋणबापत यादवलाई ७३ लाख रुपैयाँ चुक्ता गरे पनि जग्गा फिर्ता पाएनन् ।

जग्गा फिर्ता गर्न पटक–पटक आग्रह गर्दा पनि जग्गा नपाएपछि पीडितले फिर्ता गराई दिन माग गर्दै करिब ६ महिनाअघि जिल्ला अदालत धनुषामा रौनियारले मुद्दा दायर गरेका थिए ।

पीडित रौनियारको बर्दिवासमा रहेको ५ कट्ठा जग्गा २ करोड ७० लाख रुपैयाँमा यादवले बेचेको दाबी गरिएको छ । आफ्नो जग्गा बिक्री भइसकेको थाहा पाएलगत्तै रौनियारले जग्गा फिर्ता गर्न आग्रह गर्दा केही अझै समय लाग्ने भन्दै यादवले बेवास्ता गर्दै आएका थिए ।

जिल्ला अदालत धनुषाले गत साउन महिनामै पक्राउ पूर्जी जारी गरेपनि राजनीतिक आडमा यादव बच्दै आएका थिए । पछिल्लो निर्वाचनमा तत्कालीन एमाले पार्टीबाट धनुषा क्षेत्र नं. ३ (क) प्रदेश सभा सदस्यमा चुनाव समेत लडेका थिए ।