कर्णाली राजमार्गका दर्जनाैं पक्की पुल अधुरै, ठेकेदार फरार

A+ A A-

कर्णाली राजमार्गको सुर्खेतदेखि जुम्लासम्म २ सय ३२ किलोमिटर सडकमा रहेका दर्जनौं पुल ठेक्का लागे पनि अलपत्र अवस्थामा रहेका रहेको छन् । राजमार्ग सञ्चालनमा आएको १० वर्षदेखि विभिन्न निर्माण कम्पनीलाई पक्की पुल निर्माणको जिम्मा दिइएको भए पनि कम्पनीको लापरबाहीका कारण कर्णाली राजमार्गका एक दर्जनभन्दा बढी पक्की पुल अधुरै छन् ।

उक्त राजमार्गका दर्जनौं पक्की पुल नबन्दा यात्रुहरूले वर्षायाममा निकै सास्ती भोग्नुपरेको छ भने यो राजमार्ग दुर्घटनाको प्रमुख कारण समेत बन्न पुगेको छ ।

कालिकोट दैलेखको सिमानमा पर्ने घट्टेखोला पुल निर्माण १५ महिनाभित्र सम्पन्न गर्ने गरी ०६९ सालमै याक्थुमहार गोल्डेन जेभी काठमाडौंले निर्माणको जिम्म पाएको थियो । ४ करोड ५१ लाख रुपैयाँमा निर्माणको जिम्मा लिएको उक्त कम्पनीले अझैसम्म निर्माण नगरी झन् बाटो बिगारेर यात्रुहरूलाई सास्ती दिने काम गरेको गाडी चालक नरबहादुर धामी बताउँछन् । उनले भने, ‘बरु पहिले नै राम्रो थियो । भइराखेको पुललाई बिगारेर झन् सास्ती दिने काम गरेको छ ।’

ठेक्का लिँदै पेश्की लिएर भाग्दै

कर्णाली राजमार्गकै दैलेख सडकखण्डका गोठखोला र कुमाले खोलामा ४ करोड रुपैयाँभन्दा बढीको लागतमा पुल निर्माणको जिम्मा लिएको बिटी धर्मेन्द्र १४ जेभी निर्माण कम्पनी आफूले निर्माणको जिम्मा लिएको पुलको निर्माण कार्य नै नगरी फरार छ ।

त्यस्तै, राजमार्गको दैलेख खण्डको जाक्सी खोलामा पुल निर्माणका लागि ढलान गर्न मात्र बाँकी राखेर अलपत्र छोडिएको छ ।

घट्टेखोला, कालेखोला, टाकुल्ला खोला, छिडेना खोला, खल्लागाड, बालीगाढ, सिम्ला खोलाको पुल निर्माणको जिम्मा लिएका ठेकेदारहरू फरार रहेको सडक डिभिजन कार्यालय जुम्ला प्रमुख नारायणदत्त भण्डारीले जानकारी दिएका छन् । ‘बालीघाट, सिम्ले, छिडेना खोला, घट्टेखोला, कर्णाली पुललगायतको जिम्मेवारी आफ्नो रहेका कारण ठेकेदार कम्पनीहरूलाई पत्र काटेका छौं,’ उनले भने, ‘अहिले यस क्षेत्रमा आरएसडीपी नामक संस्थाले काम थाल्ने भएको छ ।’

कर्णाली राजमार्गको कालिकोट सडकखण्डमा पर्ने टाकुल्ला खोला पुल निर्माणको जिम्मा लिएको जागृति तुल्सी दुर्गा जेभीले २०६८ सालमा ३५ लाख पेश्की लिएर फरार छ ।

प्रकाशित मिति: मंगलबार, असोज २८, २०७६ १३:२८