मोदीलाई तामझामका साथ स्वागत गरेको जनकपुर सीबारे मौन !

A+ A A-

चिनियाँ राष्ट्रपति सी चिनफिङलाई स्वागत गर्न काठमाडौं आतुर छ । मन्त्रीदेखि नेता, कर्मचारी, सुरक्षाकर्मीलाई भ्याइनभ्याइ छ । विश्वको दोस्रो ठूलो शक्ति राष्ट्र तथा उत्तरी छिमेकी मुलुकका राष्ट्रपतिको भ्रमणबाट नेपालको आर्थिक समृद्धिमा टेवा पुग्ने अपेक्षामा आमनागरिक पनि उत्साहित छन् ।

तर, प्रदेश २ को राजधानी भने शान्त देखिन्छ । भारतीय प्रधानमन्त्री आउँदा रमाएको जनकपुर चिनियाँ राष्ट्रपतिको आगमनमा मौनजस्तै देखिन्छ ।
जनकपुरधाम क्षेत्रका वामपन्थी नेताले सामाजिक सञ्जालमार्फत चिनियाँ राष्ट्रपति सीलाई स्वागतसम्म गरेका छैनन् ।

किन यस्तो भयो त ? राजनीतिक विश्लेषक डा. सुरेन्द्र लाभ भन्छन्, ‘यो मनोवैज्ञानिक असर हो ।’

उनका अनुसार सीमा, संस्कृति र भाषाका कारण मधेसी जनता भारतलाई अलि नजिक ठान्छन् । यस्तै नेपालका उत्तरी भेगका जनतामा भारतभन्दा चीनप्रति बढी झुकाव छ । ‘त्यसैले जनकपुरमा तामझाम भएन भनेर अचम्म मान्नुपर्दैन,’ उनले भने, ‘तर, जो भए पनि पाहुनालाई खुला हृदयले स्वागत गर्नुपर्छ । भारत वा चीनका राष्ट्रप्रमुख हाम्रा लागि समान हुन् ।’

प्रदेश २ का मन्त्रीहरु स–साना कुरामा प्रतिक्रिया दिन्छन् । तर, उत्तरी छिमेकी मुलुकका राष्ट्रपति आउँदा भने मौन छन् । तपाईंहरुले स्वागतमा एउटा स्टाटस पनि राख्नुभएन नि भन्ने प्रश्न गर्दा प्रदेश २ का तीन जना मन्त्रीले जवाफ दिन चाहेनन् ।

प्रदेश २ का उद्योग, वन, पर्यटन राज्यमन्त्री सुरेश मण्डलले भने मुस्किलले बोले । उनले आफूहरुका लागि सबै पाहुना समान रहेको बताए ।
‘उहाँ जनकपुरधाम आउनुभएको हुन्थ्यो भने स्वागतका लागि यहाँ पनि बजारदेखि समाजिक सञ्जाल भरिएको हुन्थ्यो,’ उनले भने, ‘चीनका नेताहरुले मधेसीलाई अहिले पनि नजिक नदेखेकाले यहाँका जनता उदासीन भएका हुन सक्छन् ।

नेपाल र चीन सरकारबीच १२ वटा बिग प्रोजेक्टमा हस्ताक्षर हुँदैछ । यीमध्ये कुनै पनि आयोजना मधेशमा नरहेको बताइएको छ । संघीय सरकार पनि चीनको विकासलाई उत्तरतर्फ मात्रै राख्न चाहन्छ भन्ने आशंकामा मधेसी जनता रहेको विश्लेषकहरु बताउँछन् ।

मधेस मामिलाका जानकार डा. राजेश अहिराजले भने, ‘आशंका आफ्नो ठाउँमा छ तर, छिमेकी मुलुकको राष्ट्र प्रमुखको भ्रमणलाई हामीले स्वागत गर्नुपर्छ, देशभित्रको अन्तरविरोध देखाउनु हुँदैन ।’

रेलमार्ग, हुलाकी सडक र कृषिको आधुनिकीकरण गर्ने परियोजना चीनबाट आउँछ भन्ने अपेक्षा मधेसले गरेको उनको भनाइ छ ।

तर, राजनीतिक विश्लेषक डा. लाभ भने चीनले मधेसलाई बेवास्ता गरेको भन्न नमिल्ने बताउँछन् । ‘यहाँका पत्रकार, राजनीतिज्ञ, उद्योगी व्यापारीलाई पटक–पटक चीन घुमाएर चीनले नजिकिने संकेत गरेको छ ।’

प्रकाशित मिति: शनिबार, असोज २५, २०७६ १६:१३