स्थानीयको रचनात्मक विरोध : नगरपालिका कार्यालयमा फोहोरको डंगुर

A+ A A-

सर्लाही जिल्लाका स्थानीयले विरोधको नयाँ तथा रचनात्मक तरिका अपनाएका छन् । लामो समयदेखि बजारको फोहर व्यवस्थापन नभएपछि स्थानीयवासी रचनात्मक विरोधमा उत्रिएका हुन् । उनीहरुले बजारमा थुप्रिएको फोहोर बरहथवा नगरपालिकाको कार्यालयमा थुपारेका छन् ।

सप्तमीदेखि बजार क्षेत्रमा जम्मा भएको फोहोर नगरपालिकाले सफा नगरेपछि कार्यालयमा लगेर फालिएको हो । स्थानीयवासीका अनुसार चाडवर्पको समयमा बजारमा धेरै फोहर जम्मा भएको थियो । पटकपटक फोहर उठाउन अनुरोध गर्दापनि नगरपालिकाले चासो नदेखाएपछि नगरपालिका कार्यालयमा फाल्न वाध्य भएको उनीहरुले बताएका छन् ।

बजारको फोहोरले भरिएपछि अहिले नगरपालिका कार्यालय दुर्गन्धित भएको छ । दसैं लागेदेखि नै नगरपालिका बजारको फोहर उठाउन निरुत्साही देखिएको बरहथवा उद्योग वाणिज्य संघका अध्यक्ष निरञ्जन दासले आरोप लगाएका छन् ।

चाडपर्वका बेला किनमेल गरिने ठाउँ नै फोहोर भएपछि सहर नै दूर्गन्धित भएको थियो । त्यसैले वाध्य भएर व्यापारी र स्थानीयबासी मिलेर सबै फोहोर नगरपालिकामा थुपारिएको स्थानीयवासीले बताए ।

लेखापालले चाडपर्वको मुखमा दुईजना मेस्तरको तलब र खर्च नदिएपछि उनीहरुले फोहोर उठाउन छाडेको नगरप्रमुख देवानन्द महतोले बताएका छन् ।

‘नगरपालिकामा १२ जना मेस्तर छन् । १० जनाले तलब पाएका थिए । दुई जनाले तलब पाएका थिएनन् । दसैंमा बैंक बन्द भएपनि हामीले उनीहरुलाई नगद मै तलब दिएका थियौं’, उनले भने, ‘लेखापालका कारण कसैले पनि चाडपर्व खर्च पाएका छैनन् । चाडपर्वको सयममा खर्च नपाएको असन्तुष्टीमा मेस्तरहरुले फोहर उठाउन छाडेका हुन् ।’

फोहर उठाउन छाडेको मौकाको फाइदा उठाउँदै केही राजनीतिक दलले मेस्तरहरुलाई उकासेर नगरपालिकामा फोहर फाल्न लगाएको नगरपालिकाका अधिकारीहरुले आरोप लगाएका छन् ।

प्रकाशित मिति: बिहीबार, असोज २३, २०७६ १६:३१