देउवा भन्छन्– सत्तारूढ नेकपाले राज्य आतंक मच्चायो

A+ A A-

प्रमुख प्रतिपक्षी दलका नेता तथा पूर्वप्रधानमन्त्री शेरबहादुर देउवाले विपक्षी दलका नेता र कार्यकर्तामाथि सत्तारुढ दलले बारम्बार आक्रमण गरेर राज्य आतंक मच्चाएको आरोप लगाएका छन् ।

संघीय संसदको चौथो अधिवेशनको अन्तिम बैठकलाई बिहीबार सम्बोधन गर्दै देउवाले प्रजातन्त्रको लागि फेरि आन्दोलन गर्नुपर्ने अवस्था आए स्थिति गम्भीर हुने चेतावनीसमेत दिए ।

‘कांग्रेसको जागरण अभियानको क्रममा बाँकेको खजुरामा पार्टी नेता र कार्यकर्तामाथि आक्रमण भएको छ,’ देउवाको प्रश्न थियो, ‘कांग्रेसको जिल्ला सभापति ७० वर्षीय किरण कोइराला असुरक्षित छन् भने म प्रधानमन्त्रीलाई सोध्न चाहन्छु , यहाँ को सुरक्षित छ ?’

हातहतियारबिन भेला हुन पाउने र बोल्न पाउने अधिकार संविधानले ग्यारेण्टी गरेको अवस्थामा शान्तिपूर्ण रुपमा हलभित्र कार्यक्रम गर्दा नेकपाले कार्यकर्ता लगाएर हात भाँचिदिएको भन्दै उनले आपत्ति जनाए । ‘यस्तै हो भने सत्तापक्षबाहेकका दलले पनि आक्रमण गर्दै हिँडेमा देश कहाँ जान्छ ?’, देउवाले भने, ‘ संविधान बमोजिम दोषीलाई कारबाही नगर्ने हो भने जनताले दिएको करबाट तलव खाने र सुविधा लिने प्रहरी प्रशासनको व्यवहार स्वीकार्य छैन ।’

उनले प्रहरी र कर्मचारीलाई कुनै पार्टीले तलव नदिएकाले कर्मचारीलाई कुनै पनि पार्टीको कार्यकर्ता बन्ने र बनाउने कार्य कांग्रेसलाई कुनै पनि हालतमा स्वीकार्य नहुने भन्दै सरकारको व्यवहार परिवर्तन नभएमा संसदमा धेरै पटक रोष्टम बन्द हुने चेतानी दिए । ‘संविधानको भावना र संघीयता विपरीत कार्यमा सरकार लाग्नु अत्यन्तै दुःखद् कुरा हो । सरकार संविधान उल्लंघन गर्नमा उद्दत छ । संविधानले कार्यपालिका, व्यवस्थापिका र न्यायपालिकाबीच शक्ति पृथकीकरण र सन्तुलनको व्यवस्था गरेको छ । तर, सरकार न्यायपालिकामाथि हस्तक्षेप गर्ने, व्यवस्थापिकालाई आफ्नो खेलौना बनाउने प्रयत्नमा छ,’ देउवाले भने ।

संवैधानिक व्यवस्थाअनुसार सबै सवैधानिक निकायहरु स्वतन्त्र हुनु पर्ने भए पनि राष्ट्रिय मानवअधिकार आयोगजस्तो निष्पक्ष र स्वतन्त्र हुनुपर्ने निकायमाथि सरकारले नियन्त्रण गर्ने प्रयास गरेको देउवाको आरोप छ ।

‘प्रधानमन्त्रीले भ्रष्टाचारमा शून्य सहनशीलता अपनाउने भने पनि नेपालको इतिहासमा सबैभन्दा भ्रष्टाचारको घटना यही डेड वर्षको अवधिमा भएको छ । वाइडबडी, न्यारो बडी जहाज प्रकरण, सुनकाण्ड, बालुवाटार जग्गा प्रकरण यस्ता उदाहरण हो’, देउवाले भने ।

उनले सम्पूर्ण राज्य संरचनालाई भ्रष्टीकरण गर्ने काम भएको आरोप लगाए । संविधानलाई सुदृढ गर्ने कानून बनाउनुको सट्टामा सरकारले एक पछि अर्को विवादित विधेयक ल्याउने काम गरेको दाबी गरे । ‘प्रतिपक्षको भनाइ नसुन्ने, शान्ति सुरक्षाको अवस्था हुँदै जाने, निर्मला पन्तको हत्याारालाई पत्ता लगाउन नचाहने, बलात्कारका अनेकौं घटना नियन्त्रण गर्ने भन्दा तथ्याङ्क संकलन गर्ने निकायको रुपमा सरकारी संयन्त्र काम गरेका छन्’, सभापति देउवाले भने ।

सत्तारुढ नेकपाको संसदीय दलका उपनेता तथा संविधानसभाका अध्यक्ष सुभासचन्द्र नेम्बाङले विपक्षी दलको नेताले भनेजस्तै जनतामा सरकारप्रति निरासा नछाएको दाबी गरे ।

राष्ट्रिय जनता पार्टी (राजपा) नेपालका सांसद राजेन्द्र महतोले भने, ‘भोलि दिवाली मनाउने रे, हो सभामुख महोदय ?, सबैले सबैतिर धुमधामसँग संविधान सबै भूभागमा मनाउँछन त ? मधेसी, थारु, जनजातिले मनाउँदैन । अब ती सबै राष्ट्रघाति हुन त ?’

उनले सरकारको उपप्रधानमन्त्रीले संविधान दिवस नमनाउने कस्तो खालको संविधान दिवस हो भनेर प्रश्न गरे । उनले भने, ‘७० प्रतिशत जनताले ब्ल्याक आउट गर्छन् । दीपावली कसले मनाउने ? पुरै सरकारले त दिपावली मनाएको छैन ।’

उनले सरकारको पक्षले नै संविधान दिवस नमनाए पछि यो सरकारको वैधानिकतामाथि प्रश्न उठेको टिप्पणी गरे ।

उनले ज्ञान आर्जनको लागिसमेत कर लगाउने गरेको भन्दै एनसेलको घोटाला काण्डामा को को हो संलग्न छन् खोजबिन गर्न माग गरे ।

सदनको हालको सेशनलाई ‘काला अध्याय’ भन्दै सभामुखको रुलिङलाई समेत नटेरेर सरकारले लगौंटी लगाइ दिएको आरोप लगाए । उनले प्रश्न गरे, ‘लाल आयोगको प्रतिवेदन खोई सार्वजनिक गरेको ? तपाईंलाई पनि टेरेको छैन । अपमान गरेको छ, यो सरकारले ।’

प्रकाशित मिति: शुक्रबार, असोज ३, २०७६ ०६:०७