६० दिनमा १ सय ९३ घण्टा काम, १७ विधेयक पारित

A+ A A-

संघीय संसदको चौथो अधिवेशन बिहीबार अन्त्य भएको छ । १६ वैशाख २०७६ बाट सुरू भएको प्रतिनिधिसभाकोे बैठक बिहीबारसम्म १ सय ४४ दिन चालू रहेको सभामुख कृष्णबहादुर महराले बताए ।

६० दिनमा ६५ पटक बैठक बसी जम्मा १ सय ९३ घण्टा ४० मिनेट ससंदीय काम कारबाही भएको र यो अवधिमा संघीय संसदको दुवै सदनको संयुक्त बैठक २ पटक बसी ४ घण्टा ५ मिनेट समय खर्च भयो ।

अधिवेशनले नेपाल सरकारको नीति तथा कार्यक्रममाथि छलफल गरी २४ वैशाखमा बहुमतबाट पारित गरेको, आर्थिक वर्ष २०७६/०७७ का लागि विनियोजन विधेयकका सिद्धान्त र प्राथमिकता सम्बन्धमा (कर प्रस्तावबाहेक) छलफल गरी १५ जेठमा राजश्व र व्ययको वार्षिक अनुमान बजेट बहुमतबाट पारित गरेको थियो ।

यो अधिवेशनमा प्रतिनिधिसभामा १७ वटा सरकारी विधेयक दर्ता भएकोमा ७ वटा संघीय संसदको दुवै सदनबाट पारित भएको, ५ विधेयक सभामा प्रस्तुत हुन बाँकी रहेको छ, ४ विधेयक सम्बन्धित समितिहरूमा विचाराधीन अवस्थामा छन् ।

सभामुख महराले राजस्व चुहावट (अनुसन्धान तथा नियन्त्रण) (पहिलो संशोधन) विधेयक, २०७५ प्रतिनिधिसभाबाट पारित भई राष्ट्रिय सभामा पठाइएको जनाए ।

‘प्रतिनिधिसभाको दोस्रो र तेस्रो अधिवेशनमा दर्ता भएका विभिन्न १९ वटा विधेयकमध्ये ८ विधेयक दुवै सदनबाट पारित भएका छन भने ६ विधेयक समितिमा विचाराधीन छन्’, सभामुख महराले भने, ‘औद्योगिक व्यवसाय विकास प्रतिष्ठान विधेयक सभाबाट पारित भई राष्ट्रिय सभामा पठाइएको र ३ विधेयक सभामा प्रस्तुत हुन बाँकी छन् ।’

अघिल्लो अधिवेशनमा प्रतिनिधि सभाले पारित गरे पनि राष्ट्रिय सभाले पारित गर्ने प्रक्रिया पूरा नगर्दा राष्ट्रपति विद्यादेवी भण्डारीद्वारा फिर्ता गरिएको राहदानी विधेयक, २०७५ अहिले भने संघीय संसदको दुवै सदनबाट संशोधनसहित पारित भएको छ ।

अधिवेशनमा राष्ट्रिय सभामा उत्पत्ति भई प्रतिनिधिसभाको दोस्रो, तेस्रो र यस अधिवेशनमा प्राप्त भएका विभिन्न ७ वटा विधेयकहररूमध्ये २ वटा विधेयक प्रतिनिधिसभाबाट पारित भइसकेका छन् भने ५ वटा विधेयक सम्बन्धित समितिमा विचाराधीन अवस्थामा छन् ।

यो अधिवेशनमा संघीय संसदबाट कूल १८ वटा विधेयकहरू पारित भएका छन् भने जरुरी सार्वजनिक महत्वको प्रस्ताव पेश भएकोमा त्यसमाथि छलफल गरी प्रस्ताव अनुमोदन गरेको थियो ।

अधिवेशनले संसदका पूर्वसदस्यहरू भिक्षु अश्वघोष, दिवाकर गोल्छा, रुद्रमणि शर्मा भण्डारी, रामकृष्ण ताम्राकार, धनीराम पौडेल र छियामा राईको निधन भएकोमा शोक प्रस्तावहरू पारित गरेको थियो ।

प्रकाशित मिति: शुक्रबार, असोज ३, २०७६ ०३:५८