हनुमानको मन्दिरमा गाउँपालिकाको कार्यालय !

A+ A A-

भवनको अभावमा सर्लाहीको चक्रघट्टा गाउँपालिकाको कामकाज त्यहाँको एउटा मन्दिरमा भइरहेको छ । बीचको कोठामा हनुमानको प्रतिमा रहेको उक्त मन्दिरको एकापट्टि अध्यक्ष र अर्कोपट्टि उपाध्यक्षको कोठा बनाई गाउँपालिकाको कामकाज संचालन गरिएको हो ।

मन्दिरको बरण्डामै गाउँ कार्यपालिकाको बैठक, तालीम तथा गोष्ठीहरूसमेत हुने गरेको छ । गाउँपालिका संचालन गर्न कृषि सेडको भवन अपुग भएपछि अध्यक्ष र उपाध्यक्ष दुई वर्षदेखि मन्दिरमा बस्दै आएको गाउँपालिकाका निमित्त कार्यालय प्रमुख मुकेशकुमार पाठकले जानकारी दिए ।

बजारको बीचमा रहेको कृषि सेडमा चारवटा स–साना कोठा रहेको अध्यक्ष विक्रमराय यादवले बताए । चार कोठामा गाउँपालिकाको सम्पूर्ण कामकाज गर्न कठिनाइ भएपछि आफू मन्दिरमा गएर बस्न थालेको उनको भनाइ छ ।

‘भाडाका लागि कुनै भवन बजारमा नपाएपछि बाध्य भएर मन्दिरमा बस्नुपरेको हो’, अध्यक्ष यादवले भने, ‘अन्य स्थानमा लगे विवाद चर्किने देखिएपछि मन्दिरमै बस्नु ठीक ठानें ।’

‘सेडमा कार्यालय प्रमुख, स्वास्थ्य, प्रशासन र योजना शाखा संचालित छ । अन्य शाखाहरू सेडको बरन्डामै संचालन भइरहेका छन् । कर्मचारीलाई बस्ने ठाउँ छैन । मन्दिरको कोठामा झ्याल छैन । गर्मीमा जसोतसो बसेर काम गर्नुपरेको छ । मन्दिरका साधुहरूसमेत बेलाबेलामा मन्दिर खाली गर्नका लागि हल्ला गर्छन्’, यादवले दुःखेसो गरे, ‘कहिलेकाहीँ त कार्यालय समयमकै मन्दिरमा भजनकीर्तन शुरू भइहाल्छ ।’

गाउँपालिकाको आफ्नो भवन नभएपछि कामकाज गर्न अहिले निकै कठिनाइ भएको निमित्त कार्यालय प्रमुख पाठकले बताए । ‘अहिले हामीसँग चार कोठा मात्र छन् । त्यो पनि कृषि सेडको हो । कुन दिन त्यो कोठा पनि छोड्नुपर्छ कि कुनै ठेगान छैन । मन्दिरको सानो बरन्डामा तालीम गोष्ठी चलाउनुपरेको छ’, उनले भने, ‘अहिले गाउँपालिकाको भवन निर्माणाधीन अवस्था छ । त्यो बन्न अझै १ वर्ष लाग्छ । भवन निर्माणका लागि थप बजेट नहुँदा झन् ढिलाइ हुने देखिन्छ ।’

प्रकाशित मिति: बिहीबार, असोज २, २०७६ ०३:००