भुजी लिग असोज २७ देखि, टिम दर्ता सुरु

A+ A A-

भुजी लिग रनिङ शिल्ड फुटबल प्रतियोगिताको नवौं संस्करण २७ असोजबाट सुरु हुने भएको छ । रामेछाप जिल्लाकै प्रतिष्ठित फुटबल प्रतियोगिता भुजी लिग कात्तिक ४ गतेसम्म सञ्चालन हुने प्रतियोगिताका संयोजक सुदीप सुनुवारले जानकारी दिए ।

एक लाखभन्दा बढी पुरस्कार राशी रहेको प्रतियोगिताको भदौ ३० गतेबाट टिम दर्ता खुला गरिएको पनि उनले बताए । उनका अनुसार असोज २५ गतेसम्म टिम दर्ता गरिने र असोज २६ गते प्रतियोगिताको टाइसिट सार्वजनिक गर्ने कार्यक्रम रहेको छ ।

रु. ३५०० शुल्क तिरेर आयोजक लिखु भुजी रामेछाप युवा क्लबको कार्यलयमा गएर वा फोन तथा इमेलमार्फत पनि टिम दर्ता गर्न सकिने सुनुवारले बताए । फोन वा इमेलमार्फत टिम दर्ता गर्न चाहनेले भने आयोजकका राष्ट्रिय वाणिज्य बैंकमा रहेको खाता नं. १४२०००४३२१०१ मा दर्ता शुल्क जम्मा गरेर भौचर पेश गर्नुपर्नेछ ।

प्रतियोगिताको विजेता टोलीले ७४ हजार रुपैयाँ नगद पुरस्कार सहित ट्रफि, मेडल तथा प्रमाणपत्र प्राप्त गर्नेछ । यस्तै, उपविजेता टोलीले ३७ हजार तथा तेस्रो हुने टोलीले १३ हजार पाँच सय रुपैयाँ सँगै मेडल तथा प्रमाणपत्र प्राप्त गर्नेछन् ।

प्रतियोगितामा उत्कृष्ट हुने एक खेलाडीलाई ‘बेस्ट प्लेयर’को अवार्डसहित व्यक्तिगत विधातर्फ सर्वाधिक गोलकर्ता र उत्कृष्ट गोलरक्षकलाई पनि पुरस्कृत गरिनेछ । यस्तै, सेमिफाइनल पछिका खेलमा उत्कृष्ट प्रदर्शन गर्ने खेलाडीलाई ‘म्यान अफ द म्याच’को रुपमा आकर्षक पुरस्कार दिइने आयोजकले जानकारी दिएको छ ।

वेलायती सेनामा कार्यरत बुद्धि सुनुवारको विशेष पहल तथा सहयोग र स्थानीय युवाको सक्रियतामा सुरु भएको भुजी लिग फुटबल प्रतियोगिता जिल्लाकै प्रतिष्ठितमध्येको प्रतियोगिता हो । प्रतियोगिता विगत ९ वर्षदेखि दसैं र तिहारको बीचमा आयोजना हुँदै आइरहेको छ ।

गाउँमा स्थानिय युवाको फुटबलप्रतिको आकर्षणले मलाई यो प्रतियोगिता सुरु गर्न प्रेरित गरेको थियो । अहिले यो प्रतियोगिताले जिल्लामा खेलकुद महोत्सवको छवि बनाउन सफल भएको देख्दा गर्व लाग्छ । राज्य र जिल्लाले जागरुकता नदेखाए पनि हामी स्थानियकै अग्रसरताले आज भुजी लिग नवौं संस्करणसम्म आइपुगेको छ । विदेशमै बस्ने भएकाले मैले केही संस्करण हेर्न पाइन । विदेशमै बसेर आवश्यक सहयोग तथा सल्लाह दिने गरेको थिएँ । यसपटक भने म प्रतियोगिताकै लागि भनेर समय मिलाएर नेपाल आउँदै छु , संरक्षक बुद्धि सुनुवारले बताए ।

स्थानीय युवाहरूको प्रतिभा प्रस्फुटन र खेलकुदप्रतिको लगावलाई प्रोत्साहन गर्न प्रतियोगितालाई निरन्तरता दिइएको उपाध्यक्ष सुनुवारले बताए । लिखु भुजी रामेछाप युवाको आयोजनामा हुने प्रतियोगितालाई उमाकुण्ड गाउँपालिकाले प्रायोजन गरेको हो भने सोही गाउँपालिकाको वडा नं. ७ ले सह–प्रायोजन गरेको छ ।

प्रकाशित मिति: मंगलबार, भदौ ३१, २०७६ ०६:५५