निर्मला हत्या प्रकरण : रवि लामिछानेविरुद्ध उच्च अदालतमा मुद्दा

A+ A A-

न्युज २४ टेलिभिजनबाट प्रशारण हुने ‘सिधा कुरा जनतासँग’का प्रस्तोता रवि लामिछाने र निलम्बित डिएसपी अंगुर जिसीविरुद्ध उच्च अदालतमा मुद्दा दायर भएको छ । निर्मला हत्या प्रकरणमा मुछिएका दीलिपपसिंह विष्टका दाजु खडक विष्टले यसअघि जिल्ला अदालत कन्चनपुरमा दायर गरेको मुद्दा खारेज भएपछि उनी उच्च अदालत पुगेका हुन् ।

विष्टले जिल्ला अदालतको फैसला बदर गरी लामिछाने र जिसीलाई अदालतको अवहेलना अभियोगमा सजाय गर्न माग गर्दै सोमबार उच्च अदालत दिपायलकाे महेन्द्रनगर इजलाशमा पुनरावेदन दर्ता गराएका हुन् ।

‘अदालतमा विचारधीन मुद्दामा रवि लामिछाने र अंगुर जिसीले सार्वजनिक बहस गरी यो मुद्दालाई अन्तै मोड्न खोजेका छन्,’ पुनरावेदनमा भनिएको छ, ‘यसरी अदालतमा चलिरहेको मुद्दालाई अन्तै मोड्न खोज्नु अदालतको अवहेलना हो । उनीहरुलाई हदैसम्मको कारबाही गरियोस् ।’

१६ भदौमा खड्क विष्टले दिएको मुद्दा जिल्ला अदालतले खारेज गरिदिएको थियो । जिल्ला आदलतको सोही फैसला बदर गरी रवि लामिछाने र अंगुर जिसीलाई कारबाहीको माग गर्दै विष्टले उच्च अदालतमा पुनरावेदन हालेका हुन् ।

१९ साउन राति लामिछानेले ‘सिधा कुरा जनतासँग’मा निर्मला हत्या प्रकरणबारे लामो बहस गरेका थिए जहाँ कञ्चनपुरका पत्रकार खेम भण्डारी र निर्मला बलात्कार तथा हत्या प्रकरण छानबिनमा दोषी मानिएर निलम्बनमा परेका डिएसपी अंगुर जिसी थिए ।

रविले कार्यक्रममा खेम भण्डारीलाई झुक्याएर अंगुर जिसीलाई बोलाएका थिए । कार्यक्रममा केही तथ्य अगाडि राखेर निर्मलाका दोषी ‘दीलिपसिंह विष्ट’ नै हुन् भन्ने मतमा रविले जोड गरेका थिए ।

कार्यक्रममा यस्तो भएको थियो

कार्यक्रम चलिरहेको थियो । अंगुर जिसी आएर अर्को पोर्डियममा उभिए । लगत्तै पत्रकार भण्डारीले रविले आफूलाई झुक्याएको भनेर आपत्ति जनाए । रविले आफूले ‘इथिक्स’ नकुल्चिएको भन्दै सम्झाउन खोजे । बहस यसरी बहकियो र अन्ततः चुरो कुरो हुनै नपाइ कार्यक्रम सकियो ।यसपछि सुदूरपश्चिममा रविबारे अनेक टिकाटिप्पणी भएको थियो । पत्रकार भण्डारीका समर्थकले रविलाई गाली गरेर सामाजिक सञ्जालमा लेखेका थिए ।

निर्मला हत्या प्रकरणमा रविले ‘एकपक्षीय’ ढंगले प्रस्तुति दिएर जबर्जस्ती दीलिपसिंह विष्टलाई नै अपराधि करार गर्न खोजेको भन्दै विष्टका दाजु खडकले जिल्ला अदालतमा मुद्दा हालेका थिए । तर, जिल्ला अदालतले मुद्दा खारेज गरिदिएको थियो ।

यसअघि नेपालमा अवैधानिक रुपमा काम गरेको तथा आफ्नी पूर्वपत्नीको विषयमा रवि विवादित बनेका थिए भने पत्रकार शालीकराम पुडासैनीलाई आत्महत्याका लागि दुरुत्साहन गरेको अभियोगमा जिल्ला अदालत चितवनले पाँच लाख धरौटी लिएर रिहा गरेको थियो ।