नगरपालिकालाई बालबालिकाकाे ज्ञापनपत्रसहित ५ रुपैयाँ सहयोग

A+ A A-

बालदिवस देशभर मनाइरहँदा सप्तरीको राजविराज नगरपालिकाका बालबालिकाले भने नगरपालिकाले बजेट नदिएको तथा कुनै कार्यक्रम नगरेको भन्दै र्‍यालीसहित नाराबाजी गर्दै विरोध प्रदर्शन गरेका छन् ।

राष्ट्रिय बालदिवस मनाउनका लागि नगरपालिकाले बजेट नछुट्याएपछि उनीहरूले नगरपालिकाविरुद्घ चर्को नाराबाजी गर्नुका साथै नगरपालिकामा ज्ञापनपत्रसहित ५ रुपैयाँ सहयोगसमेत प्रदान गरेका छन् ।

स्थानीय शिव मन्दिरको प्रांगणबाट जिल्ला बाल सञ्जाल, नगरस्तरीय बाल सञ्जाल तथा बालअधिकारका लागि राष्ट्रिय अभियान नेपाललगायत संस्थाको संयुक्त अगुवाइमा निकालिएको बालबालिकाको जुलुस नगरपालिकाविरुद्घ चर्को नाराबाजी गर्दै नगरपालिकाको कार्यालयमा पुगी ज्ञापनपत्रसहित ५ रुपैयाँ सहयोग बुझाएका छन् ।

बालदिवस मनाउन नगरपालिकाले बजेट नछुट्याएकाले विरोधस्वरुप ५ रुपैयाँ सहयोग गरेको बालअधिकारका लागि राष्ट्रिय अभियान नेपाल सप्तरीका सहसंयोजक सौरभ यादवले बताए । उनले डेंगु रोग अहिले भयावह रूपमा फैलिए पनि नगरपालिकाले नियन्त्रणका लागि खासै पहल नगरेको आरोप लगाए ।

बालअधिकारको संरक्षण गर्न नगरपालिकासँग बजेट नभएकाले बालबालिकाबाट संकलित ५ रुपैयाँ सहयोग गरिएको उनको भनाइ छ । जिल्ला बाल सञ्जाल सप्तरीका अध्यक्ष वरदान श्रेष्ठले राष्ट्रिय बालदिवस भव्य रूपमा मनाउन पटकपटक आग्रह गर्दा पनि नगरपालिकालाई कुनै चासो नदेखाएको गुनासो पोखे ।

उनले नगरपालिकाका सामाजिक विकास अधिकृत एवम् सूचना अधिकारी मनोज यादवलाई पटकपटक गुहारे पनि बजेट नभएको भन्दै पन्छिने गरेको सुनाए । यादवले राष्ट्रिय बालदिवस मनाउन सहयोगका लागि बाल सञ्जाल तथा बालक्लबहरू आएको विषय बारे आफूलाई कुनै जानकारी नभएको बताए ।

उनले आगामी दिनमा राष्ट्रिय बालदिवस भव्य रूपमा मनाउन बालबालिकाका लागि आवश्यक बजेट छुट्याउने प्रतिवद्धता व्यक्त गरे । यता बाल दिवस बालबालिकाका लागि महत्त्वपूर्ण दिन भएको तर राजविराज नगरपालिकाले यस दिवसलाई महत्त्व नदिएकोमा स्थानीय बुद्घिजीवीहरूले पनि कडा आलोचना गरेका छन् ।

प्रकाशित मिति: सोमबार, भदौ ३०, २०७६ ०५:५५