धनगढी यातायात कार्यालय : कर्मचारी नहुँदा सेवाग्राही मारमा

A+ A A-

कार्यालय प्रमुखसहित ३ जना कर्मचारी अख्तियारको फन्दामा परेपछि प्रभावित यातायात व्यवस्था कार्यालय धनगढीको सेवामा अझै सुधार आउन सकेको छैन । हाल छैटौं तहका शाखा अधिकृतले निमित्त प्रमुखको जिम्मेवारी पाएर कार्यालय चलाइरहेका छन् ।

सहजै सेवा नपाएपछि सेवाग्राही रित्तो हात फर्किन बाध्य छन् । लगातार कार्यालय धाउँदा पनि सेवा नपाएको धनगढी हसनपुरकी कल्पना रावतले गुनासो गरिन् ।

नयाँ सवारी दर्ताका लागि यातायात कार्यालय पुगेका गोदावरी नगरपालिकाका गोविन्द शाहले १२ दिन कार्यालय धाउँदा पनि काम हुन नसकेको बताएका छन् ।

यातायात कार्यालय सेवाग्राहीको अत्यधिक चाप हुने कार्यालय हो । दरबन्दीअनुसार कर्मचारी अभाव रहेकोमा भएका कर्मचारी पनि अख्तियारको फन्दामा परेपछि समस्या बढेको हो ।

हाल छैटौं तहका शाखा अधिकृतले निमित्त प्रमुखको जिम्मेवारी पाएर कार्यालय चलाइरहेका छन् । कार्यालयको सम्पूर्ण कार्य सम्पादन गर्ने अधिकार नपाएका कारण सेवाग्राहीलाई सास्ती भइरहेको कार्यालयका निमित्त नन्दलाल पाण्डेले बताए । कर्मचारी पदपूर्ति नभएसम्म समस्या समाधान नहुने उनले दाबी गरे ।

प्रमुखविहीन यातायात कार्यालय

दुई सातादेखि यातायात कार्यालय प्रमुखविहीन छ । अख्तियार दुरुपयोग अनुसन्धान कार्यालय महेन्द्रनगरको टोलीले कार्यालय प्रमुख गम्भीर सिंह विष्टलाई घूस रकमसहित पक्राउ गरेपछि कार्यालय प्रमुखविहीन भएको हो ।

विष्टसहित २ जना अन्य अधिकृत पनि पक्राउ परेका छन् । कार्यालयका शाखा अधिकृत भुवन जोशी र अधिकृत जयराज कारिगरलाई १ लाख ६६ हजार १ सय रुपैयाँ घूस रकमसहित रंगेहात नियन्त्रणमा लिएको थियो ।

कार्यालय प्रमुख विष्ट पनि निमित्त भएर काम गर्दै आएका थिए । विष्टसहित ३ जना अधिकृत पक्राउ परेपछि सुदूरपश्चिम प्रदेश सरकारले कार्यालय प्रमुख पठाउन सकेको छैन ।

प्रदेश सरकारले सिनियरका आधारमा अधिकृत नन्दलाल पाण्डेलाई आर्थिक कारोबारबाहेक प्रशासनिक जिम्मेवारी दिएको छ । यद्यपि कार्यालयमा कुनै पनि कर्मचारीको नेम प्लेट राखेको छैन । जसले गर्दा सेवाग्राही अन्योलमा पर्ने गरेका छन् ।

यातायात व्यवस्था कार्यालय कैलालीबाट दैनिक ५ सयभन्दा बढी सेवाग्राहीले सेवा लिन्छन् । यही भदौ १२ देखि कार्यालय प्रमुखविहीन भएपछि प्रशासनिक कामबाहेक आर्थिक कारोबार ठप्प छ ।

कार्यालयमा दरबन्दीअनुसार कर्मचारी नहुँदा कामको चाप सम्हाल्न नसक्ने गरी बढेको निमित्त कार्यालय प्रमुख पाण्डेले बताए ।

दरबन्दीअनुसार छैनन् कर्मचारी

एक जना उपसचिवसहित २४ जनाको दरबन्दी भएको कार्यालयमा १५ जना कर्मचारी छन् । भएका कर्मचारी पनि तल्लो तहका मात्र भएको निमित्त प्रमुख पाण्डेले जानकारी दिए ।

‘कार्यालयमा कर्मचारी दरबन्दी पुरानै छ,’ उनले भने, ‘तर, सेवाग्राहीको चाप दुई गुणाले बढेको छ । भएका कर्मचारीहरूमध्ये पनि ४ जना स्थानीय तहमा समायोजन भएका छन् ।’

कर्मचारी व्यवस्थापनका लागि पहल भएन

फोटो खिच्न मात्र एक दिन लाग्ने गरेको धनगढी उपमहानगरपालिका १४ का राम सुनारले बताए । जति चाँडो आए पनि कार्यालयमा भीड उस्तै हुने गरेको उनले गुनासो गरे ।

कार्यालयको ढिला सुस्तीले सेवाग्राही हैरान छन् । एक जनाको लाइसेन्स नवीकरण गर्न दुई दिन पूरै खर्चिनुपर्ने बाध्यता रहेको टिकापुरका जनक धामीले गुनासो गरे । निमित्त कार्यालय प्रमुख पाण्डेले एउटै तहका कर्मचारीलाई निर्देशन दिन समेत गाह्रो हुने गरेको गुनासो गरे ।

कैलाली यातायात व्यवस्था कार्यालयमा प्रमुख नहुँदा समस्या भएको मन्त्रालयलाई जानकारी भएको सुदूरपश्चिम प्रदेश भौतिक पूर्वाधार मन्त्रालयका सचिव इन्द्रदेव भट्टले जानकारी दिए । कर्मचारी व्यवस्थापनका लागि पहल भइरहेको उनको भनाइ छ ।

कर्मचारीहरू घूस प्रकरणमा अख्तियारको फन्दामा परेको २ साता पुग्दा पनि कर्मचारी व्यवस्थापनमा लागि सम्बन्धित निकायले चासो दिएको छैन ।

यातायात व्यवस्था कार्यालयको सेवा चुस्त दुरुस्त राख्न सुदूरपश्चिम प्रदेश सरकारले कुनै पहल नगरेको यातायात कार्यालयका कर्मचारीहरु बताउँछन् । हाल छैंटौं तहका शाखा अधिकृतद्वारा कार्यालय सञ्चालन हुँदा पनि सरोकारवाला निकाय मौन छन् । जसको प्रत्यक्ष मारमा सेवाग्राहीहरू परेका छन् ।

प्रकाशित मिति: सोमबार, भदौ ३०, २०७६ ०१:०५