एएफसी यू–१६ च्याम्पियनसिप छनोट : जोर्डनसँग भिँड्दै नेपाल

A+ A A-

जोर्डनमा सुरु एएफसी यू–१६ च्याम्पियनसिप छनोट प्रतियोगितामा नेपालले आज (शनिबार) पहिलो खेल खेल्दैछ । नेपालले आफ्नो पहिलो खेलमै प्रतिबद्वन्द्वीका रुपमा बलियो टोली जोर्डनलाई पाएको छ ।

अम्मानको जार्का सिटीस्थित प्रिन्स मोहम्मद अन्तर्राष्ट्रिय रंगशालाबाट जितका साथ निस्कन नेपालका लागि कम चुनौतीपूर्ण छैन । किनकि, तुलनात्मक रुपमा जोर्डन नेपालभन्दा निकै अब्बल मानिन्छ । जोर्डनलाई बराबरीमै रोक्न सके पनि नेपालका लागि उपलब्धि मानिने छ ।

नेपाली टिमका प्रशिक्षक सुनिल श्रेष्ठ पनि जोर्डनलाई बराबरीमा रोक्ने रणनीति नै टिमले अवलम्बन गर्ने बताउँछन् । ‘पहिलो कुरा हामी उनीहरुकै मैदानमा खेल्दैछौं,’ प्रशिक्षक श्रेष्ठले भने, ‘त्यसै पनि जोर्डन निकै बलियो प्रतिद्वन्द्वी हो, त्यसैले हाम्रो प्राथमिक रणनीति भनेको उसलाई बराबरीमा रोक्नु नै हो ।’

नेपाल हालैमात्र भातमा सम्पन्न साफ यू–१५ च्याम्पियनसिपमा उपविजेता बनेको थियो । तर, टिमलाई उपविजेता बनाउँदा कम्पतानको भूमिका निभाएका प्रदीप लम्सालसहित अन्य दुई खेलाडी असिम राई र इश्वर गुरुङले जोर्डनसँगको खेल गुमाएका छन् । एमआरआईबाट उमेर बढी भएको रिपोर्ट आएपछि उनीहरु जोर्डन जानबाट रोकिएका हुन् ।

लम्साल जोर्डन जान नपाएपछि नेपाली टिमको कप्तानी जान लिम्बुले पाएका छन् ।

सन् २०२० मा आयोजना हुने च्याम्पियनसिपको छनोटमा नेपाल समूह ’ए’ मा छ र यो समूहमा आयोजक जोर्डनसँगै कुवेत, ताजकिस्तान र श्रीलंका रहेका छन् ।

नेपालले जोर्डनपछि दोस्रो खेलमा ३० भदौमा कुवेतसँग प्रतिस्पर्धा गर्नेछ । तेस्रो खेलमा ३ असोजमा ताजकिस्तानसँग खेल्ने नेपालले आफ्नो अन्तिम खेल ५ असोजमा श्रीलंकासँग खेल्नेछ ।

प्रकाशित मिति: शनिबार, भदौ २८, २०७६ १७:१८