कालिका मिडियाको १७औं वार्षिकोत्सव : १४ वटा वार्षिक कार्यक्रम सार्वजनिक

A+ A A-

कालिका मिडियाले आफ्नो गौरवमय १७औं वार्षिकोत्सव काकार्यक्रम आज सार्वजनिक गरेको छ । कालिका मिडियाको परिसरमा सोमबार (सोमबार) आयोजित पत्रकार सम्मेलनमा विगतका कार्यक्रमलाई निरन्तरता दिँदै १४ वटा वार्षक कार्यक्रमसमेत गर्न लागिएको जानकारी गराइएको छ ।

महिनाव्यापी रूपमा आयोजित वार्षिक उत्वसवका कार्यक्रमहरूमा स्रोतालक्षित, समाजका प्रबुद्ध व्यक्तिहरूको सहभागिता रहने खालका कार्यक्रमहरू रहेका छन् । समाज र राष्ट्रको हितमा निरन्तर आफ्ना कार्यक्रम र सूचनाहरू प्रसारण गर्दै आइरहेको कालिका मिडियाले आगामी दिनमा पनि कटिबद्ध भई लाग्ने सो मिडियाका अध्यक्ष तथा प्रबन्ध निर्देशक विक्रम पाण्डेले जानकारी दिए । पूर्वमन्त्रीसमेत रहेका पाण्डेले मोफसलबाट पनि राष्ट्रिय स्तरको मिडिया सञ्चालन गर्न सकिन्छ भन्ने बलियो उदाहरण आफूले प्रस्तुत गरेको बताए ।

विगतमा कालिका मिडियाले भाषा, कला, धर्म, संस्कृतिको क्षेत्रमा गरेका राष्ट्रिय स्तरका बृहत् कार्यक्रमहरूले भिन्न पहिचान र अस्तित्व निर्माण गरेको छ । सोको निरन्तरताका लागि यसपालि पनि सोहीअनुरुपका कार्यक्रमहरूको आयोजना गरिएको पाण्डेले जानकारी गराए ।

कालिका मिडियाले १७औं वार्षिकोत्सवमा विभिन्न क्षेत्रलाई लक्षित गरी १४ वटा कार्यक्रम तय गरेको छ । यो वर्ष महिला हिंसा तथा चेलिबेटी बेचविखनविरुद्ध अन्तरक्रिया कार्यक्रम र लागू औषध प्रयोगकर्ताको अवस्था विषयक अन्तरक्रिया कार्यक्रम कालिका मिडियाले नयाँ कार्यक्रमका रूपमा तय गरेको छ । १५औं कालिका म्युजिक अवार्ड, देवघाटका वृद्धवृद्धालाई सम्मान तथा स्वास्थ्य परीक्षण, बृहत् राष्ट्रिय लोकदोहोरी तथा विविध सांस्कृतिक महोत्सव, राष्ट्रिय पञ्चे तथा सारंगी गन्धर्व बाजा प्रतियोगिता, शिक्षक तथा प्राध्यापकहरूलाई लक्षित गर्दै फुटसल प्रतियोगिता, अन्तरसहकारी महिला हाजिरी जवाफ प्रतियोगिता, कृषक समूहबीच हाजिरी जवाफ प्रतियोगिता, स्रष्टा, सृजना र संवाद कार्यक्रम, अन्तरकर्मचारी प्रतियोगिताजस्ता कार्यक्रम रहेका छन् । यस वर्ष कालिका म्युजिक अवार्डमा ३० विधामा प्रदान गर्ने भएको छ ।

कालिका मिडियाले असोज १ गते देवघाटमा रहेका वृद्ध–वृद्धालाई सम्मान, खाना खुवाउने कार्यक्रम तथा स्वास्थ्य परीक्षण गरेर आफ्ना वार्षिकोत्सव काकार्यक्रमहरू शुरू गर्ने जनाएको छ ।

त्यस्तै, शिक्षकहरूलाई लक्षित गरी असोज ३, ४ र ५ गते शिक्षक तथा प्रध्यापकहरूबीच फुटसल प्रतियोगिता गरिनेछ । असोज ७ गते अन्तरसहकारी महिलाहरूबीचको हाजिरी जवाफ प्रतियोगिता, असोज ९ गते अन्तरकृषक समूह हाजिरीजवाफ प्रतियोगिता, असोज ११ गते स्रष्टा, सृजना र संवाद कार्यक्रम, पञ्चेबाजा तथा सारंगी (गन्धर्व) बाजाको प्रतियोगिता हुनेछ ।

असोज १४ गते चेलिबेटी बेचविखनविरुद्ध सचेतनाका लागि अन्तरक्रिया, असोज १५ गते बृहत लोकदोहोरी तथा विविध सांस्कृतिक महोत्सव, असोज १६ गते लागू औषध प्रयोगकर्ताको अवस्था र न्यूनीकरण विषयक अन्तरक्रिया, असोज १७ गते अन्तर कर्मचारी खेलकुद प्रतियोगिता, असोज २६ गते कालिका एफएम स्थापनाको १७औं वार्षिकोत्सवको दीपावलीको कार्यक्रम राखिएको छ । १५औं कालिका म्युजिक अवार्ड तथा वार्षिकोत्सव समापन समारोह असोज ३० गते नारायणी कला मन्दिरमा हुने जनाइएको छ ।

‘आवाजविहीनहरूको आवाज’ बनेर २०५९ सालमा चितवनबाट प्रसारण गर्दै आएको कालिका मिडियाले मनोरञ्जनका लागि कालिका एफएम ९१ मेगाहर्जबाट निरन्तर गीतसंगीत प्रसारण गर्दै आएको छ, भने एकता, शान्ति र संस्कारको संवाहकको नारा तय गर्दै विगत ५ वर्षदेखि टीभी कालिका एचडीको प्रसारण गर्दै आएको छ । पछिल्लो पटक समयको मागलाई दृष्टिगत गर्दै कालिका न्युजडटकमको अनलाईन समेत सञ्चालनमा छ ।

प्रकाशित मिति: मंगलबार, भदौ २४, २०७६ २३:०८