सिटौलालाई योगेशले दिएको सम्मानबाट नेताकार्यकर्ताले के सिक्ने ?

A+ A A-

संस्कृति, पर्यटन तथा नागरिक उड्डयनमन्त्री भएदेखि नै योगेश भट्टराई कुनै न कुनै विषयले चर्चामा छन् । हुन त, यसअघि पनि उनी चर्चित नेतामै पर्छन् । तर, मन्त्री भएपछि अरुले भन्दा अलि फरक गतिविधिले उनी चर्चामा छन् ।

मन्त्रीको कार्यभार सम्हाल्दै गर्दा उनी खादा, माला नलिने भनेर चर्चामा आए ।

त्यसपछि ज्येष्ठ नागरिकलाई हवाइ भाडामा ५० प्रतिशत छुट दिने घोषणा गरेर चर्चा कमाए ।

बुधबार फेरि अर्को एउटा गतिविधिले उनीबारे चर्चा भइरहेको छ ।

बुधबार बिहान करिब ९ बजे बुद्ध एयरको जहाजबाट मन्त्री भट्टराई र नेपाली कांग्रेस नेता कृष्णप्रसाद सिटौला भरतपुर विमानस्थल उत्रिए । सरकारी अधिकारी, सत्तापक्ष र प्रतिपक्ष आ–आफ्नै नेता तथा मन्त्रीको स्वागतमा फूलमाला लिएर विमानस्थलमा पुगेका थिए ।

जब जहाज रोकियो मन्त्री भट्टराई र नेता सिटौलासँगै झरे । उनीहरु गफिदै अघि बढ्दै गर्दा स्वागत गर्न जिल्लाका प्रमुख जिल्ला अधिकारी जीतेन्द्र बस्नेत पुगे ।

बहालवालामन्त्री भएकाले बस्नेतले आफ्नो हातको खादा मन्त्री भट्टराईतर्फ जब लगे मन्त्री भट्टराईले रोक्दै सिटौलातर्फ देखाउँदै भने, ‘पहिला दाइलाई ।’ उनको भनाइसँगै बस्नेतलेसँगै रहेका सिटौलालाई त्यही खादा पहिले ओडाए अनि मन्त्री भट्टराईलाई अर्को खादा ओडाए ।

यो सबै हेरिरहेका नेता कार्यकर्ता स्तब्ध देखिए । दुई खादा र फूल बोकेका धेरैले पहिले सिटौला र पछि मन्त्रीलाई खादा र फूलले स्वागत गरे । जिल्ला तहमा आरोप र प्रत्यारोपमा उत्रने स्थानीय नेता कार्यकर्तालाई सकारात्मक सन्देश दिँदै सम्मानको भावसँगै मन्त्री भट्टराई बाहिरिए ।

चितवन क्षेत्र नं– २ का सङ्घीय सांसद एवं नेपाल कम्युनिस्ट पार्टी नेकपा चितवनका सचिव कृष्णभक्त पोखरेलले पनि पहिले सिटौलालाई खादाले स्वागत गरे । उनले भने,‘मन्त्रीले अत्यन्तै सकारात्मक सन्देश प्रवाह गर्नुभएको छ,’ पोखरेलले थपे, ‘लोकतन्त्र र गणतन्त्र यही पार्टी मिलेर ल्याएका हौं, अब हामी समृद्धिका लागि पनि मिल्नुपर्छ भन्ने सन्देश यसले दिन्छ ।’

युवाहरुले यो खालको संस्कार देखाउनुपर्ने पोखरेलले बताए ।

नेपाली कांग्रेस चितवनका सभापति जीतनारायण श्रेष्ठले भने, ‘विपक्षी दलका नेतालाई जुन सम्मान मन्त्री भट्टराईले दिनुभयो यसले मुख्य दल मिल्नुपर्छ भन्ने सन्देश प्रवाह भएको छ ।’

उनीहरुको स्वागतमा भरतपुर महानगर प्रमुख रेनु दाहाल, नेकपाका जिल्ला इन्चार्ज कृष्ण खनाल, जिल्ला सचिव पोख्रेल, काङ्ग्रेस जिल्ला सभापति श्रेष्ठ, प्रदेशसभा सदस्य विजय सुवेदी, घनश्याम दाहाल लगायतका स्थानीय नेता तथा कार्यकर्ताको उपस्थिति थियो ।

मन्त्री भट्टराई भरतपुर विमानस्थल विस्तारसम्बन्धी छलफल कार्यक्रममा र सिटौला पार्टीको समायोजनसम्बन्धी कार्यक्रममा सहभागी हुन चितवन पुगेका हुन् ।

केही दिनअघि मन्त्री भट्टराईले मन्त्रालयका योजनाका विषयमा प्रमुख प्रतिपक्षी दलका नेता शेरबहादुर देउवालाई भेट गरी जानकारी गराएका थिए ।

राजनीतिक लुछाचुडीका कारण अहिले युवा वर्ग पनि विभक्त छ । विपक्षी पार्टीका नेता जतिसुकै सिनियर भए पनि बेवास्ता गर्ने, अपमान गर्ने प्रवृत्तिले नेपाली राजनीति गिजोलिएको छ । सिनियर नेताले पनि विपक्षी पार्टीका युवालाई होच्याएर बोल्ने, आदर नगर्ने प्रवृत्ति छ । यस्तोमा मन्त्री योगेश भट्टराईले विपक्षी पार्टीका सिटौलालाई दिएको सम्मान एउटा पाठ हुनसक्ने राजनीतिक विश्लेषकहरु बताउँछन् ।

प्रकाशित मिति: बिहीबार, भदौ १९, २०७६ ०२:२३