नेपाललाई फाइनल पुग्न भुटानको चुनौती, यस्तो छ समिकरण

A+ A A-

भारतको कोलकातामा बिहीबार साफ यु–१५ च्याम्पियनसिपअन्तर्गत समूह चरणको अन्तिम खेल हुँदै छ । प्रतिस्पर्धा गर्दैछन् भारत र बंगलादेश तथा नेपाल र भुटान । भुटानबाहेक भोलि जो विजयी हुन्छ त्यो फाइनल पुग्ने सम्भावना बढी छ ।

नेपाल, भारत, बंगलादेश, भुटान र श्रीलंकासहित कुल ५ देश सहभागी प्रतियोगिताको लिग चरणका शीर्ष २ टिमले फाइनल खेल्नेछन् । ५ मध्ये भुटान र श्रीलंकाको फाइनल खेल्ने गणितिय सम्भावना पनि बाँकी नरहेकाले नेपाल, बंगलादेश र भारतमध्ये दुई देशले फाइनल खेल्ने छन् ।

शीर्षस्थानमा रहेको भारतले ३ खेलमा शतप्रतिशत नतिजा निकाल्दै ९ अंक जोडेको छ । ३ खेलमा नेपाल र बंगलादेशको समान ६ अंक भएपनि हेड–टु–हेडका आधारमा नेपालले दोस्रो स्थान कब्जा गरेको छ । ४ खेलमा एउटामात्र जित निकालेको श्रीलंका केबल ३ अंक जोड्दै प्रतियोगिताबाट बाहिरिसकेको छ ।

पुछारमा रहेको भुटानले ३ वटै खेल हारेकाले नेपालविरुद्धको अन्तिम खेल औपचारिकतामा सिमित रहेको छ । तर, नेपालका लागि भने भुटानविरुद्धको खेल सेमिफाइनल सरह हुने छ । भुटानविरुद्ध जित निकालेमा नेपालले फाइनलमा स्थान सुरक्षित गर्ने छ ।

भारतविरुद्धको पहिलो खेलमा ५–० को लज्जास्पद हार बेहोरेका कारण नेपालको फाइनल समिकरण यति गाह्रो बनेको हो । तर, दोस्रो खेलमा श्रीलंकालाई २–० ले तथा तेस्रो खेलमा डिफेन्डिङ च्याम्पियन बंगलादेशलाई ४–१ ले पराजित गरेपछि नेपालले प्रतियोगितामा उत्कृष्ट कमब्याक गर्‍यो ।

डिफेन्डिङ च्याम्पियन बंगलादेशविरुद्धको प्रभावशाली जित नै नेपालको फाइनल प्रवेशका लागि ‘वाइल्ड कार्ड’ साबित भएको छ । यस प्रतियोगितामा गोलअन्तरलाई नभएर हेड–टु–हेडका आधारमा अंकतालिका निर्धारण हुन्छ । शीर्षस्थानमा रहेको भारतले १७ गोल गर्दा १ गोल पनि खाएको छैन भने १३ गोल गर्दै ७ गोल खाएको बंगलादेशको ६ गोलअन्तर रहेको छ । यता नेपालले भने ६ गोल गर्दा ६ गोल नै खाएका कारण गोलअन्तर शून्य छ ।

यद्यपि, गोलअन्तरमा पछि परेपनि हेड–टु–हेडमा भने नेपाल प्रतियोगिताको ‘फ्रन्ट फुट’मा रहेको छ । जसकारण भुटानविरुद्ध पराजित भएपनि नेपालको फाइनल खेल्ने सम्भावना रहेको छ । बिहिबार हुने खेलमा सम्भव देखिएका विभिन्न गणितिय समिकरण यस्ता छन् :

नेपाल फाइनल पुग्ने समिकरण

नेपालले भुटानविरुद्ध जित निकालेमा र भारतले बंगलादेशलाई पराजित गरेमा नेपालको ९ अंक र भारतको स्पष्ट १२ अंक हुनेछ भने बंगलादेश ६ अंकमा सिमित हुनेछ । यस्तो अवस्थामा नेपाल र भारत फाइनलमा प्रतिस्पर्धा गर्नेछन् ।
यदि नेपाल भुटानसँग र बंगलादेश भारतसँग पराजित भएमा भारतको १२ अंक हुनेछ भने नेपाल र बंगलादेशको समान ६–६ अंक हुनेछ । तर, समान अंक भएका कारण हेड–टु–हेडका आधारमा नेपाल अग्रस्थानमा रहँदै फाइनल पुग्ने छ ।
यदि नेपाल भुटानसँग पराजित हुँदा बंगलादेशले भारतविरुद्ध जित निकाल्यो भने भारत र बंगलादेश समान ९–९ अंकका साथ फाइनल पुग्नेछन् भने ६ अंकमा सिमित हुँदै नेपाल रित्तो हात घर फर्किने छ ।
तर, नेपालले भुटानलाई पराजित गर्दा भारत बंगलादेशसँग पराजित भएमा ३ वटै टिमको समान ९–९ अंक हुनेछ हेड–टु–हेडका आधारमा अंकतालिका निर्धारण गर्न असम्भव हुनेछ । किनकी सो अवस्थामा हेड–टु–हेडमा भारत नेपालभन्दा माथी हुनेछ, नेपाल बंगलादेशभन्दा माथी हुनेछ र बंगलादेश भारतभन्दा माथि हुनेछ । अर्थात, त्यसले हल हुन नसक्ने ‘लुप’ उत्पन्न गर्नेछ ।
त्यस्तो अवस्थामा दुई देशबिचको गोलअन्तरले निर्णायक भूमिका खेल्ने छ । यदि बंगलादेशले भारतलाई ६ गोलभन्दा कम अन्तरले पराजित गरेमा गोलअन्तरका आधारमा पछि पर्दै फाइनल पुग्ने सम्भावना गुमाउने छ । जसको फाइदा उठाउँदै नेपालले फाइनल खेल्ने छ । तर, बंगलादेश ६ वा बढी गोलअन्तरले विजयी भएमा भारतभन्दा माथि जानेछ भने नेपाल भारतसँग हेड–टु–हेडमा पछि पर्दै समूहचरणबाटै घर फर्किनेछ । भारतको फर्म हेर्दा यस्तो नतिजा त्यति सहज भने देखिँदैन ।

यद्यपि, राष्ट्रिय टिममा मात्र नभएर भुटानविरुद्ध नेपालले हरेक उमेर समूहमा प्रभावशाली प्रदर्शन गर्दै आएको छ । जसकारण नेपालले सहजै फाइनल यात्रा गर्ने सम्भावना बढी छ । तर कुनै पनि विपक्षीलाई कमजोर आँक्नु सधैं गलत निर्णय हुन्छ । त्यसैले, विगतका वा जारी प्रतियोगिताको प्रदर्शन र नतिजालाई नजरअन्दाज गरेर नेपालले उत्कृष्ट प्रदर्शन गर्दै उच्च मनोबलका साथ फाइनल प्रवेश गर्नु नै विवेकशील हुनेछ ।

प्रकाशित मिति: बिहीबार, भदौ १२, २०७६ ०४:५०