‘फाटेको जुत्ता लाएर खेल्थें, क्रिकेटले आज यहाँसम्म पुर्‍यायो’

A+ A A-

‘बच्चाबेलामा क्रिकेट खेल्न सुरु गर्दा मलाई आज यो ठाउँसम्म आइपुग्छु भन्ने लागेकै थिएन ।’, राष्ट्रिय टिमका उपकप्तान ज्ञानेन्द्र मल्लले भने । मल्ल तनहुँको व्यास नगरपालिकाका युवाहरुलाई आफ्नो अनुभव सुनाउँदै थिए ।

‘सानैदेखि क्रिकेट एकदम मनपर्थ्यो । खेल्दाखेल्दै आजको अवस्थासम्म आइपुगेको हुँ । निरन्तरता नै सफलताको मुख्य कडी हो ।’, ज्ञानेन्द्रले बताए । व्यास नगरपालिकाले युवा परिषद्का सदस्यका लागि अभिमुखिकरण कार्यक्रम आयोजना गरेको थियो । उपकप्तान मल्ल सोही कार्यक्रममा उपस्थित युवाहरुलाई आफ्ना संघर्षका कथा सुनाउँदै थिए ।

‘आज म जुन स्थानमा छु क्रिकेटकै कारणले छु । मेरो सफलताको एकमात्र श्रेय क्रिकेटलाई जान्छ । कुनैबेला मसँग क्रिकेट खेल्न गतिलो जुत्ता समेत थिएन । म फाटेको गोल्डस्टार जुत्ता लाएर खेल्थें । त्यसैले, जति दिन क्रिकेट खेल्छु इमान्दार भएर पूर्ण आत्मविश्वासका साथ खेल्छु ।’, मल्लले आफ्ना कथा जारी राख्दै भने ।

‘मैले क्रिकेट खेलेर सिकेको महत्वपूर्ण कुरा भनेको परिश्रम र लगावले मानिसलाई सफल बनाउँछ भन्ने हो । जो व्यक्ति लगावका साथ परिश्रम गर्छ त्यो व्यक्ति सफल हुनेमा दुईमत छैन ।’, मल्ले बिट मार्दै भने ।

कार्यक्रममा सहभागीले उपकप्तान मल्लाई राष्ट्रिय टिमसम्बन्धी प्रश्न पनि राखेका थिए । नेपाली टिमको सबल पक्ष के हो भन्ने प्रश्नमा मल्लले खेलाडीबिचको एकतालाई श्रेय दिएका थिए । यस्तै, राष्ट्रिय टिमको कप्तान बन्ने इच्छाका बारेमा मल्लले आफुलाई पद पाउँदा भन्दा सबै मिलेर टिमलाई जित दिलाउन पाउँदा बढी खुशी मिल्ने बताएका थिए ।

कार्यक्रममा राष्ट्रिय महिला धावक मिरा राईको पनि उपस्थिति थियो । उनले पनि आफ्ना संघर्षका कथा सुनाइन् । गरिब परिवारमा जन्मिएर पूर्व लडाकु हुँदै राष्ट्रिय खेलाडीसम्मको उनको यात्रा प्रेरक थियो ।

‘म गरिब परिवारमा जन्मिएँ । सशस्त्र द्वन्द्वको समयमा म लडाकु भएर पनि हिँडेकी थिएँ । तर अहिले म राष्ट्रिय खेलाडी भएकी छु । दौडमार्फत देशलाई विश्वमाझ चिनाउन पाउँदा म गौरवान्वित छु ।’, राईले बताइन् ।

उक्त कार्यक्रममा व्यास नगरपालिकाका प्रमुख प्रशासकीय अधिकृत दिनेशराज पन्त, कान्तिपुर टेलिभिजनकी कार्यक्रम प्रस्तोता सविना कार्की, मध्यनेपाल पर्यटन विकास समितिका अध्यक्ष हरिसिंह गुरुङ, युवा अभियन्ता सचिन तिमिल्सेना, व्यास नगरपालिका – ५ का वडाध्यक्ष मोहनकुमार श्रेष्ठलगायतले पनि आफ्नो अनुभव सुनाएका थिए ।

कार्यक्रममा परिषद्का ४० सदस्य सहभागी थिए । व्यास नगरपालिकाका प्रमुख वैकुण्ठ न्यौपानेले अभिमुखीकरणपश्चात् नगरपालिकाका लागि जागरुक युवा तयार भएको विश्वास व्यक्त गरे ।

प्रकाशित मिति: मंगलबार, भदौ ३, २०७६ ०२:५०