सुदुरपश्चिम प्रदेशमै एक मात्र शव वाहन, शव ओसार्न चर्को मूल्य तिर्नुपर्ने बाध्यता

सुदुरपश्चिम प्रदेशमै एक मात्र शव वाहन, शव ओसार्न चर्को मूल्य तिर्नुपर्ने बाध्यता

A+ A A-

प्रदेश सरकार अन्तर्गत एउटा मात्रै शव वाहन छ भन्दा पत्यार नलाग्न सक्छ । तर यो यथार्थ हो । सुदूरपश्चिम प्रदेशमै जम्मा एउटा मात्र शव वाहन छ।

सुदुरपश्चिम प्रदेशमा रहेका ८८ स्थानीय तह मध्ये एक स्थानीय तहसँग मात्र शव वाहन छ । प्रदेशभरमा कैलालीको धनगढी उपमहानगरपालिकासँग मात्र शव वाहन छ, त्यो पनि नेपाल रेडक्रस सोसाइटीको हो ।

सिंगो प्रदेश सरकारमा एउटा मात्र शव वाहन हुँदा यहाँका स्थानीयले निकै महंगो मूल्य तिर्नुपरेको छ । एक उपमहानगपालिका, ३३ नगरपालिका र ५४ गाउँपालिका भएको सुदूरपश्चिम प्रदेशमा एक उपमहानगपालीकासँग मात्र शव वाहन रहेकाले सबैले त्यही एउटै शव वाहन भएकाले यहाँका नागरिक चर्को मुल्य तिरेर निजी सवारीमा शव ओसार्नुपर्ने बाध्यता छ ।

धनगढी बाहेक कुनै पनि जिल्लामा शव वाहन नरहेको तथ्याङ्क भएको क्षेत्रीय स्वास्थ्य निर्देशनालय डोटीका जनस्वाथ्य निरीक्षक रमेश मलासीले जानकारी दिए । ‘अहिले कुनै पनि जिल्ला अस्पतालसँग शव वाहन छैनन्’ उनले भने, ‘यस वर्ष भने प्रदेश सरकारले विभिन्न जिल्लामा शव वाहन खरिद गर्न रकम छुट्याएको छ।’

प्रदेशभरमा एउटा मात्र शव वाहन हुनु दुखद भएको स्थानीयहरुको भनाइ छ। जिल्लामा मात्र हैन, जिल्ला बाहिर उपचारका लागि लगिएका आफन्तहरुको मृत्यु हुँदासमेत निजी सवारीको भर पर्नुपर्ने बाध्यता यहाँकान नागरिकमा छ ।

‘पहुँच भएकाहरु आफ्नो व्यवस्था मिलाईहाल्छन् तर गरिव निमुखाहरुले भने आफन्तको मृत्यु भएपछि डोको, बोरामा बोक्नुपर्छ, नत्र चर्को मुल्य तिरेर जीप र ट्याक्टरमा शव बोक्नुपर्ने बाध्यता छ,’ अजयमेरु गाउँपालिका स्थानीय पदम विकले भने ।

नीजि सवारीसाधनले शव बोक्न नमान्ने र मानिहाले पनि चर्को भाडा लिने गरेको स्थानीयहरु बताउँछन्।

‘कहिँकतै दुर्घटना भयो वा अस्पतालमै विरामीको मृत्यु भयो भने शव कसरी लैजाने भन्ने चिन्ता हुन्छ,’ डडेल्धुराका स्थानीय लोकेन्द्र विष्ट भन्छन्, ‘शव पोष्टमार्टम तथा सतगति गर्नुपर्यो भने निकै समस्या हुने गर्दछ ।’ आत्महत्या, भैपरी आएका घटना, दुर्घटनामा मृत्यु भएका व्यक्तिको शवपरीक्षण गर्नुपर्ने भएकाले अस्पतालसम्म लैजाने साधनको अभाव हुने गरेको उनको भनाइ छ ।

अतिआवश्यक बनेको शव वाहन किन्नको लागि स्थानीय प्रशासन तथा स्थानीय सरकारले अग्रसर हुनुपर्ने डडेल्धुरा अस्पताल डडेल्धुराका मेडिकल सुपरिटेन्डेन्ट डाक्टर जीतेन्द्र कँडेल बताउँछन् । ‘अस्पतालबाट एक ठाउँबाट अर्को ठाउँमा शव लैजान परिवारलाई गाह्रो छ । नीजि गाडीले शव लैजान मान्दैन, लैजाने गाडीले महंगो पैसा लिने गरेका छन्,’ उनले भने ।

प्रकाशित मिति: बिहीबार, साउन ३०, २०७६ १८:५७