‘वडाको विकास’ले ११ सय घर जोखिममा (भिडियोसहित)

A+ A A-

काठमाडौंको नागार्जुन नगरपालिका वडा नम्बर ३ को ‘विकास’का कारण करिब ११ सय घर संकटमा परेका छन् । २ लाख २५ हजार लिटर पानीको ट्यांकीमा क्षति पुग्ने गरी वडाले बाटो बनाएपछि नागार्जुन–३ को गैरीगाउँवासी आतंकित भएका छन् ।

नयाँ बाटो बनाइएको कारण २ लाख २५ हजार लिटरको ट्यांकीमा क्षति पुगेको तिनधारा खानेपानी विकास समितिका अध्यक्ष भक्त लामाले जानकारी दिए । सो बाटो ३ नम्बर वडा कार्यालयले बनाएको हो ।

‘ठूलो परिमाणमा पानी राखिएको ट्यांकीको जगबाट बाटो बनाउन खनियो, त्यसरी खनेकै समयमा यो क्षेत्रमा ठूलो पानी पर्यो, त्यसैकारण ट्यांकी र वरपरको क्षेत्र पनि चर्किएको छ, कुनै कारणबस ट्यांकी फुट्यो भने ठूलो मात्रामा जनधनको क्षति हुने अवस्था छ,’ समितिका अध्यक्ष लामाले भने ।

ट्यांकी बनाइएकोभन्दा तल्लो भाग निकै भिरालो छ । कुनै कारणवस ट्यांकी विस्फोट भएर २ लाख २५ हजार लिटर पानी एकैचोटी निस्किएमा तल्लो तटीय क्षेत्रका करिब ११ सय घरमा क्षति पुग्ने स्थानीयको भनाइ छ ।

पानीको ट्यांकीमा क्षतिपूगेपछि आफूहरु रातभर जाग्राम बस्ने गरेको स्थानीयले बताएका छन् ।

‘हाम्रो सरकारले गरेको कामको कारण हामी डरमर्दाे अवस्थामा पुगेका छौं, जनप्रतिनिधिलाई केही भन्न सक्ने अवस्था पनि छैन, तर, ट्यांकी फुट्यो भने हाम्रो घर पनि बाँकी रहदैन, हामी पनि बाँच्दैनौं,’ एक स्थानीयले शिलापत्रसँग भने ।

वडा अध्यक्ष प्रेमलाल श्रेष्ठ पनि खानेपानीको ट्यांकीमा समस्या देखिएपछि त्यसको सुरक्षा विकल्प अपनाइएको बताए । नगरपालिकाले बजेट विनियोजन गरेर बनाएको बाटोको कारण खानेपानी ट्यांकीको सुरक्षा जोखिम बढाएको उनको भनाइ छ ।

‘सार्वजनिक जग्गामा खानेपानीको ट्यांकी छ, त्यसैको तल्लोभागबाट बाटो निर्माणको बजेट नगरपालिकाले दिएको रहेछ, बाटो बनाउने क्रममा ट्यांकीको भाग चर्किएको छ, हामी त्यसको व्यवस्थापनमा लागिपरेका छौं,’ वडा अध्यक्ष श्रेष्ठले भने ।

वडा अध्यक्ष श्रेष्ठका अनुसार नागार्जुन नगरपालिकाले ट्यांकीको तल्लो भागबाट जाने गरी बाटो बनाउन १८ लाख रुपैयाँ बजेट दिएको छ । अहिले बनाउन लागिएको बाटोभन्दा माथि अर्काे पक्की सडक पनि छ । तर, अहिले पक्की बाटो भएको जग्गा व्यक्तिको भएको र नयाँ बाटो बनाउन लागिएको जग्गा पनि व्यक्तिकै भएकोले सम्बन्धित जग्गाधनीको आग्रह बमोजिम नगरपालिकाले बाटो सार्न बजेट उपलब्ध गराएको वडा अध्यक्षले बताए ।

भिडियाे हेर्नुहाेस ः

प्रकाशित मिति: बुधबार, साउन २९, २०७६ ०२:१३